នាព្រឹកថ្ងៃសុក្រ ៧កើត ខែបុស្ស ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី២៦ ខែធ្នូ ឆ្នាំ២០២៥ គណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា ដឹកនាំដោយ លោកជំទាវ និន សាផុន ប្រធានគណៈកម្មការ និង ឯកឧត្តមបណ្ឌិត លី ឆេង អនុប្រធានគណៈកម្មការ និងជាស្ថាបនិក-អគ្គនាយក ប៊ែលធី គ្រុប រួមជាមួយ ឯកឧត្តម លោកជំទាវ លេខាធិការ សមាជិក-សមាជិកាគណៈកម្មការ និង ឯកឧត្តម ស៊ុយ សែម តំណាងរាស្ត្រមណ្ឌលខេត្តពោធិ៍សាត់ បាននាំយកអំណោយដ៏ថ្លៃថ្លារបស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា និង អំណោយមូលនិធិសប្បុរសធម៌ ប៊ែលធី (BELTEI Charity) ដើម្បីប្រគល់ជូនវីរកងទ័ព និងជនភៀសសឹក ចំនួន ៩០០គ្រួសារ នៅក្នុងខេត្តពោធិ៍សាត់ ដោយមានការសម្របសម្រួល និងទទួលស្វាគមន៍ពី ឯកឧត្តម ខូយ រីដា អភិបាលនៃគណៈអភិបាលខេត្ត។ កម្មវិធីប្រគល់អំណោយនេះ ក៏មានការអញ្ជើញចូលរួមពី គណៈគ្រប់គ្រង បុគ្គលិក សាស្ត្រាចារ្យ លោកគ្រូ អ្នកគ្រូ និងតំណាងសិស្ស-និស្សិតប៊ែលធី មួយចំនួនផងដែរ។

សូមជម្រាបជូនថា អំណោយដ៏ថ្លៃថ្លារបស់ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និង អំណោយមូលនិធិសប្បុរសធម៌ ប៊ែលធី (BELTEI Charity) រួមមាន៖

ក-សម្រាប់ប្រគល់ជូន វីរកងទ័ព

១-ថវិកា ចំនួន  ៦០,០០០,០០០៛ (ហុកសិបលានរៀល)
២-អង្ករ ចំនួន ៥តោន
៣-អំបុក ចំនួន ៥,០០០ដប (៦០០គីឡូ)
៤-ត្រីខ ចំនួន ៥០០ យួរ
៥-មីជាតិ ចំនួន ៥០០ កេស
៦-ទឹកសុទ្ធ ចំនួន ៥០០ កេស
៧-ឆៃប៉ូវ ចំនួន ៥០០ គីឡូ

ខ-សម្រាប់ជនភៀសសឹក ចំនួន ៩០០គ្រួសារ ដោយក្នុង១គ្រួសារ ទទួលបាន៖

១-ថវិកា ចំនួន ៥០,០០០៛ (ប្រាំម៉ឺនរៀល)
២-អង្ករ ចំនួន ១បេ (ទម្ងន់ ១០គីឡូ)
៣-ទឹកសុទ្ធ ចំនួន ១កេស
៤-កញ្ចប់សម្ភារប្រើប្រាស់-គ្រឿងឧបភោគ-បរិគោគ ចំនួន ១កញ្ចប់ (1Kit)៕