ឯកឧត្តមបណ្ឌិត លី ឆេង តំណាងរាស្ដ្រមណ្ឌលរាជធានីភ្នំពេញ ស្ថាបនិក-អគ្គនាយក នៃប៊ែលធី គ្រុប និងជាប្រធានក្រុមប្រឹក្សាភិបាល នៃសាកលវិទ្យាល័យ ប៊ែលធី អន្តរជាតិ បានអញ្ជើញជាអធិបតីភាពដ៏ខ្ពង់ខ្ពស់ ក្នុងកម្មវិធី “បរិច្ចាគឈាម ដើម្បីសង្គ្រោះជីវិត” ដោយមានការអញ្ជើញចូលរួមពីសំណាក់ ឯកឧត្តម លី ណាវុឌ្ឍ អគ្គនាយករង នៃប៊ែលធី គ្រុប និងជាសាកលវិទ្យាធិការ នៃសាកលវិទ្យាល័យ ប៊ែលធី អន្តរជាតិ ព្រមទាំងឯកឧត្តម លោកជំទាវ ជាអគ្គនាយករង-អគ្គនាយិការរង នៃប៊ែលធី គ្រុប លោកវេជ្ជបណ្ឌិត សុខ ប៉ូ ប្រធានមជ្ឈមណ្ឌលជាតិផ្តល់ឈាម ក៏ដូចជាក្រុមគ្រូពេទ្យ មកពីមជ្ឈមណ្ឌលផ្ដល់ឈាម ថ្នាក់ដឹកនាំ ដែលជាប្រធាន អនុប្រធាន សាកលវិទ្យាធិការរង ព្រឹទ្ធបុរស ព្រឹទ្ធបុរសរង បុគ្គលិក សាស្រ្តាចារ្យ និស្សិត នៃប៊ែលធី គ្រុប និងសប្បុរសជនទាំងអស់ សរុបចំនួនប្រមាណជាង ១,០០០នាក់។

កម្មវិធីបរិច្ចាគឈាមដោយស្ម័គ្រចិត្តនេះ បានរៀបចំឡើងក្នុងគោលបំណង ដើម្បីចូលរួមចំណែកជាមួយសង្គម ក្នុងការជួយសង្គ្រោះជីវិតអ្នកជំងឺដែលត្រូវការជំនួយ និងឈាមជាចាំបាច់។ កម្មវិធីនេះដែរ បានឆ្លុះបញ្ចាំងពីការជួយទុក្ខធុរៈគ្នានៅក្នុងសង្គមមួយ ជាពិសេសការជួយសង្រ្គោះជីវិតអ្នកដែលកំពុងត្រូវការជំនួយ តាមរយៈការបរិច្ចាគឈាម។

កម្មវិធីនេះបានប្រព្រឹត្តទៅនៅថ្ងៃសៅរ៍ ១៣ រោច ខែមិគសិរ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី២៨ ខែធ្នូ ឆ្នាំ២០២៤ នៅសាកលវិទ្យាល័យ ប៊ែលធី អន្តរជាតិ ទីតាំងទី២-ស្ពានអាកាសចោមចៅ។