ឯកអគ្គរាជទូតនៃចក្រភពអង់គ្លេសប្រចាំនៅកម្ពុជាចែកវិញ្ញាបនបត្រកំរិតអន្តរជាតិ
ដល់សិស្សវិទ្យាស្ថាន ប៊ែលធី អន្តរជាតិ
នៅសៀលថ្ងៃទី០៣ ខែ កុម្ភៈ ឆ្នាំ២០១០ នៅការិយាល័យកណ្តាលនៃ ប៊ែលធី គ្រុប(អូរឫស្សី) ដែលមានទីតាំងឋិតនៅអាគារលេខ២៥A ផ្លូវ១០៥ សង្កាត់បឹងព្រលិត ខណ្ឌ៧មករា បានប្រារពពិធីប្រគល់វិញ្ញាបនបត្រអន្តរជាតិភាសាអង់គ្លេសអន្តរជាតិ (Password Test) កុំព្យូទ័រអន្តរជាតិ(ICDL) ភាសាអង់គ្លេសទូទៅ កំរិត៦ និងកំរិត១២ ដែលពិធីនេះប្រព្រឹត្តទៅក្រោមអធិបតីភាព ឯកឧត្តម អិនដ្រូ ម៉េស ឯកអគ្គរាជទូតនៃប្រទេសអង់គ្លេស ប្រចាំនៅកម្ពុជា ឯកឧត្តម លី ឆេង ទីប្រឹក្សាអមទីស្តីការគណៈរដ្ឋមន្ត្រី អគ្គនាយក ប៊ែលធី គ្រុប និងជានាយកវិទ្យាស្ថាន ប៊ែលធី អន្តរជាតិ និងមានការចូលរួមពីសំណាក់គណៈប្រតិភូមកពីចក្រភពអង់គ្លេស ព្រមទាំងភ្ញៀវកិត្តិយស អាណាព្យាបាលសិស្ស គណៈគ្រប់គ្រង លោកគ្រូ-អ្នកគ្រូ និងបុគ្គលិក នៃវិទ្យាស្ថាន ប៊ែលធី អន្តរជាតិទាំងអស់។ ឯកឧត្តម លី ឆេង ទីប្រឹក្សាអមទីស្តីការគណៈរដ្ឋមន្ត្រី អគ្គនាយក ប៊ែលធី គ្រុប និង ជានាយកវិទ្យាស្ថាន ប៊ែលធី អន្តរជាតិ បានឲ្យដឹងថាគោលបំណងនៃការប្រារព្ធពិធីនេះ គឺដើម្បីអបអរសាទរ និងលើកទឹកចិត្តដល់ សិស្ស និស្សិត ដែលបានសិក្សាភាសាអង់គ្លេសទូទៅ Level 6 និងLevel 12 ជំនាន់ទី13 និងបានប្រឡងបញ្ចប់វគ្គហើយជាប់ជាស្ថាពរ នៅថ្ងៃ 25-26 ខែមករា ឆ្នាំ2010 កន្លងមកនេះ ។ ក្នុងឱកាសនោះឯកឧត្តមក៏បានបញ្ជាក់ផងដែរថា ដើម្បីលើកទឹកចិត្ត ដល់សិស្សភាសាអង់គ្លេស Level 12 ដែលបានប្រឡងបញ្ចប់វគ្គនៅថ្ងៃខាងលើ ហើយបានពិន្ទុខ្ពស់ ចាប់ពី70ឡើងទៅ គឺត្រូវបានអនុញ្ញាតអោយប្រឡងតេស្តភាសាអង់គ្លេស Password ដោយឥតគិតថ្លៃ(តំលៃប្រឡងធម្មតា ៦៥$) ដែលជាតេស្ត អន្តរជាតិ ដែលមាន ដំបូងបង្អស់នៅកម្ពុជា។ តេស្តផ្នែកកុំព្យូទ័រជាអន្តរជាតិ (ICDL) ក៏មានសិស្សចូលប្រឡង ចំនួន15នាក់ ហើយបានជាប់ និងទទួលវិញ្ញាបនបត្រនៅពេលនេះដែរ។ សិស្សដែលត្រូវបាន ទទួលវិញ្ញាបនបត្រភាសាអង់គ្លេស អន្តរជាតិ (Password) មានចំនួន ៣២នាក់ សិក្សកុំព្យូទ័រអន្តរជាតិ (ICDL) មានចំនួន ១៥នាក់ សិស្សភាសាអង់គ្លេសទូទៅ Level ៦ មានចំនួន៣៤៨នាក់ និងសិស្សភាសាអង់គ្លេសទូទៅ Level ១២ មានចំនួន ១០៧នាក់ បូកសរុបទាំងមានចំនួន ៥០២នាក់ ។ ឯកឧត្តម លី ឆេង ក៍បានបញ្ជាក់ផងដែល ថាវិទ្យាស្ថានក៍បានធ្វើការបណ្តុះបណ្តាលលើមុខវិជ្ជាធំៗចំនួន ៥ដូចជា: ១.ចំណេះទូទៅ (General Education) មានពីថ្នាក់ទី១ ដល់ទី១២ សិក្សាតាមកម្មវិធី ក្រសួងអប់រំ យុវជន និងកីឡា និងមានការបន្ថែមភាសាអង់គ្លេសលើចំនងជើង-ចំនងជើងរង និងសិក្សាកម្មវិធីកុំព្យូទ័រ ចាប់ពីថ្នាក់ទី៦ ដល់ថ្នាក់ទី៨។ ២.ភាសាអង់គ្លេសទូទៅ (ESL, English as Second Language) កំរិត Pre-School ដល់ Level12 សិក្សាតាមបែបអាមេរិកកាំង (American System) ហើយសៀវភៅសិក្សាទាំងអស់ ត្រូវបានជួយឧបត្ថម្ភដោយក្រុមហ៊ុន McGraw-Hill Education នៅសហរដ្ឋអាមេរិក។ ចំពោះសិស្ស Level12 (High Advanced Level) ពេលបញ្ចប់ការសិក្សាត្រូវទទួលបានវិញ្ញាបនបត្រ ២ប្រភេទ ដែលមានដូចខាងក្រោមៈ ប្រភេទទី១ ជាវិញ្ញាបនបត្របញ្ជាក់ការសិក្សាកំរិតក្នុងស្រុក ដែលចេញដោយ ប៊ែលធីការិយាល័យ កណ្តាល(Head Office)។ ប្រភេទទី២ ជាវិញ្ញាបនបត្រភាសាអង់គ្លេសកំរិតអន្តរជាតិ (Password ឬ TOEFL) ដែលចេញដោយក្រុមហ៊ុន English Language Testing Ltd មានទីតាំងនៅទីក្រុងឡុងនៃប្រទេសអង់គ្លេស និងវិញ្ញាបនបត្រថូហ្វល (TOEFL) ដែលចេញដោយស្ថាប័ន ETS (Educational Testing Service) មានទីតាំងធំ នៅសហរដ្ឋអាមេរិក។ ៣.មហាវិទ្យាល័យភាសាបរទេស ដែលចាប់យកជំនាញតែមួយគត់គឺ បរិញ្ញាបត្រ បរិញ្ញាបត្ររង ផ្នែកអក្សរសាស្ត្រអង់គ្លេស (BA, Bed & AA In English)។ សិក្សាតាមប្រព័ន្ធក្រេឌីត។ ទទួលស្គាល់ពេញសិទ្ធិដោយ គណៈកម្មការទទួលស្គាល់គុណភាពអប់រំនៃកម្ពុជា។ ៤.វគ្គបណ្តុះបណ្តាលកុំព្យូទ័រ (Computer Training Course) ដែលមាន២២កម្មវិធី ហើយកម្មវិធី ទាំងនោះគឺស្របតាមតម្រូវការទីផ្សារបច្ចុប្បន្ន ។ ៥.ថ្នាក់ត្រៀមប្រឡងតេស្តអន្តរជាតិ- វិទ្យាស្ថាន ប៊ែលធី អន្តរជាតិ បានទទួលសិទ្ធ និងច្បាប់អនុញ្ញាតអោយបើកមជ្ឈមណ្ឌលតេស្តជាអន្តរជាតិជាផ្លូវ ការធំៗ ៣ពី បណ្តាស្ថាប័នភាសាអង់គ្លេស និងកុំព្យូទ័រជាអន្តរជាតិដូចជាៈ ក.មជ្ឈមណ្ឌលប្រឡងតេស្តថូហ្វល (TOEFL iBT, Testing of English as a Foreign Language) ជាមជ្ឈមណ្ឌលប្រឡងតេស្តវាស់ស្ទង់សមត្ថភាពភាសាអង់គ្លេសជាអន្តរជាតិ ដែលទទួលស្គាល់ជាង ១៦០ ប្រទេសនៅលើពិភពលោក ។ ខ.មជ្ឈមណ្ឌលប្រឡងតេស្តភាសាអង់គ្លេសអន្តរជាតិ (Password Test) ជាមជ្ឈមណ្ឌលប្រឡងតេស្តវាស់ ស្ទង់សមត្ថភាពភាសាអង់គ្លេសបែប English System ពីក្រុមហ៊ុន English Language Testing Ltd ដែលមានទីតាំង នៅទីក្រុងឡុង នៃប្រទេសអង់គ្លេស។ គ.មជ្ឈមណ្ឌលប្រឡងតេស្តកុំព្យូទ័រអន្តរជាតិ (ICDL, International Computer Driving License) ជាមជ្ឈមណ្ឌលប្រឡងតេស្តវាស់ស្ទង់សមត្ថភាព ផ្នែកកុំព្យូទ័រជាអន្តរជាតិ សំរាប់និស្សិត ដែលត្រូវទៅរៀនបន្តនៅក្រៅប្រទេស និងបំពេញការងារតាមអង្គការ ក្រុមហ៊ុននានាផងដែរ ។ គ្រប់តេស្តទាំងអស់សុទ្ធតែបានរៀបចំឡើងតាមបែបខ្នាតអន្តរជាតិ ហើយសិស្សដែលបានប្រឡងតេស្តអន្តរជាតិ នៅមជ្ឈមណ្ឌលប្រឡងរបស់ប៊ែលធី (ការិយាល័យកណ្តាល អូរឫស្សី) នឹងទទួលបានវិញ្ញាបនបត្រអន្តរជាតិ ដែលចេញដោយស្ថាប័នខាងលើដោយផ្ទាល់ ។ ជាទីបញ្ចប់ឯកឧត្តម លី ឆេង ក៏បានថ្លែងអំណរគុណយ៉ាងជ្រាលជ្រៅចំពោះ ឯកឧត្តម អិនដ្រូ ម៉េស(Andrew Mace) ឯកអគ្គរាជទូត ចក្រភពអង់គ្លេស ប្រចាំនៅកម្ពុជា ដែលបានឆ្លៀតឳកាសដ៍មានតំលៃ អញ្ចើញមកផ្តល់កិត្តិយស ធ្វើជាប្រធានគណៈអធិបតី ក្នុងពិធីចែកវិញ្ញាបនបត្រអន្តរជាតិ នៅក្នុងពេលនេះ ហើយឯកឧត្តម ក៍បានថ្លែងអំណរគុណដល់មាតាបិតា និងអាណាព្យាបាលសិស្សដែលបានផ្តល់ទំនុកចិត្តមកលើ វិទ្យាស្ថាន ប៊ែលធី អន្តរជាតិរបស់យើង។ |
ឯកឧត្តមក៍ បានផ្តល់អនុសាសន៍ ជូនដល់សិស្សានុសិស្ស និស្សិត អោយខិតខំរៀនសូត្រ និងស្រាវជ្រាវនូវទ្រឹស្តីថ្មីៗ និងព័ត៌មានថ្មីៗ ដែលពិភពលោកកំពុងតែវិវត្តិទៅមុខ តាមបទពិសោធន៍ ដែលលោកធ្លាប់មាន រៀនមាន៣ គឺ រៀនពីសាលា រៀនពីការងារ និងរៀនដោយខ្លួនឯង ព្រមទាំងបានផ្តាំផ្ញើរដល់សិស្សានុសិស្ស និស្សិត ទាំងអស់ អោយប្រព្រឹតតែអំពើល្អ ប្រកបដោយសីលធម៌ និងធ្វើជាធនធានមនុស្ស ដ៍សំខាន់ក្នុងការរួមចំណែកអភិវឌ្ឍន៍ សង្គមជាតិ ក្រោមការដឹកនាំដ៍ត្រឹមត្រូវ និងឈ្លាសវៃប្រកបដោយគតិបណ្ឌិតរបស់សម្តេច អគ្គមហាសេនាបតីតេជោ ហ៊ុន សែន ដែលជាវីរៈកុលបុត្រខ្មែរដឺឆ្នើម ដែលបានបូជាកំលាំងកាយ កំលាំងចិត្ត ដើម្បីបុព្វហេតុជាតិ និងធ្វើអោយសង្គមទាំងមូល បានសុខសន្តិភាពពេញលេញ ប្រកបដោយការអភិវឌ្ឍន៍ នៅទូទាំងប្រទេស។
បន្ទាប់មក ឯកឧត្តម អិនដ្រូ ម៉េស ឯកអគ្គរាជទូតអង់គ្លេស ប្រចាំនៅកម្ពុជា ក៍បានធ្វើការចាប់អារម្មណ៍ ចំពោះការចែក វិញ្ញាបនបត្រ Password និង ICDL នាថ្ងៃនេះ និង បានថ្លែងនូវការកោតសរសើរចំពោះវិទ្យាស្ថានប៊ែលធី អន្តរជាតិ ដែលមានទំនាក់ទំនងល្អជាមួយសកលវិទ្យាល័យនានា ក៍ដូចជាស្ថាប័នអប់រំ នៅចក្រភពអង់គ្លេស ហើយ និងទទួលបានច្បាប់អនុញ្ញាតអោយបើកមជ្ឍមណ្ឌល Password និង ICDL ដំបូងគេបង្អស់នៅកម្ពុជា។
ឯកឧត្តម ក៍បានបញ្ចាក់ផងដែលថា វិស័យអប់រំនៅចក្រភពអង់គ្លេស គឺបានរីកដុះដាលយ៉ាងខ្លាំង ដែលអាចចាត់ទុកថា ជាឧបករណ៍សំរាប់អភិវឌ្ឍន៍ ធនធានមនុស្ស សេដ្ឋកិច្ច និងសង្គមជាតិ អោយបានរីកចំរើន ហើយថ្នាក់ដឹកនាំមួយចំនួន នៅអឺរ៉ុប ក៍ធ្លាប់បានទៅសិក្សានៅប្រទេសផងដែរ។
ឯកឧត្តមក៍បានសង្កត់ ធ្ងន់ថា ភាសាអង់គ្លេស គឺជាភាសាមួយដែលត្រូវបាន គេប្រើប្រាស់ច្រើនជាងគេ នៅលើពិភពលោក ក្នុងការទំនាក់ទំនងការងារផ្សេងៗ ហើយឯឧត្តម ក៍បានមានប្រសាសន៍ផងដែរថា ការធ្វើតេស្ត Password និង ICDL ក៍ជាផ្នែកមួយបង្ករលក្ខណៈងាយស្រួលជូនដល់ សិស្ស និស្សិត ដើម្បីសុំទិដ្ឋាការ ទៅសិក្សាបន្តរនៅចក្រភពអង់គ្លេសផងដែរ។
ជាទីបញ្ចប់ ឯកឧត្តមក៍បានចែក វិញ្ញាបនបត្រ Password ជូនដល់សិស្សចំនូន៣២នាក់ និង វិញ្ញាបនបត្រ ICDL ចំនូន១៥នាក់ប្រកបដោយ ក្តីសោមនស្សរីករាយជាទីបំផុត៕