កាលពីថ្ងៃទី២១ ខែកុម្ភៈ ឆ្នាំ២០១២ នៅសាលសន្និសីទ នៃវិទ្យាស្ថាន ប៊ែលធី អន្តរជាតិទី៩ (សាខាស្ទឹងមានជ័យ) បានរៀបចំពិធី ប្រគល់វិញ្ញាបនបត្រ ជូនដល់សិស្ស ភាសាអង់គ្លេសទូទៅ កម្រិតអន្តរជាតិ(TOEFL)និងភាសាអង់គ្លេសកម្រិតទី៦ និងទី១២ ជំនាន់ទី២១ &ទី២២ មានចំនួនសរុប ៨៦០នាក់ នារី ៤០១នាក់ ក្រោមអធិបតីភាព ដ៏ខ្ពង់ខ្ពស់របស់ ឯកឧត្តម លី ឆេង ទីប្រឹក្សាអមទីស្តីគណៈរដ្ឋមន្រ្តី អគ្គនាយក ប៊ែលធី គ្រុប និងជានាយក វិទ្យាស្ថាន និងលោកជំទាវ ព្រមទាំងថ្នាក់ដឹកនាំ និងសិស្សានុសិស្ស នៃវិទ្យាស្ថាន ប៊ែលធី អន្តរជាតិទាំងអស់ សរុបជាង ១.០០០នាក់។
តាមរបាយការណ៍ របស់លោក ផូរ សុធារៈ ប្រធានការិយាល័យរដ្ឋបាល បានមានប្រសាសន៍ថាៈ វិទ្យាស្ថាន ប៊ែលធី អន្តរជាតិ បានបង្កើតឡើងនៅថ្ងៃទី ០១ ខែមករា ឆ្នាំ២០០២ បច្ចុប្បន្នមាន១១ទីតាំង នៅក្នុងរាជធានីភ្នំពេញ និងមានសិស្ស-និស្សិតកំពុងសិក្សាចំនួន ២០.៥៧៦នាក់ ក្នុងនោះនារី ៨.៨៦៧នាក់ ព្រមទាំងមានគណៈគ្រប់គ្រង លោកគ្រូ-អ្នកគ្រូ និងបុគ្គលិក បម្រើការសរុបចំនួន ១.០៤២នាក់ នារី ៣៤៦នាក់។ ដោយមានការរីក ចម្រើនជាបន្តបន្ទាប់ និងបានអនុវត្តយ៉ាង ខ្ជាប់ខ្ជួនតាមបាវចនា របស់ខ្លួនគឺ “គុណភាព ប្រសិទ្ធភាព ឧត្តមភាព សីលធម៌ គុណធម៌” (Quality, Efficiency, Excellence, Morality, Virtue) វិទ្យាស្ថាន ប៊ែលធី អន្តរជាតិ ក៏បានបង្កើតជា ប៊ែលធី គ្រុប តាមវិញ្ញាបនបត្រ ក្រសួងពាណិជ្ជកម្ម លេខ១៨១២ ពណ.នតក ចុះថ្ងៃទី ១៧ ខែឧសភា ឆ្នាំ២០០៧ ដែលមានបម្រើសេវាធំៗ ៣ដូចជាៈ ១-ប៊ែលធី សំណង់ (BELTEI Construction) ទិញ+លក់ អចលនទ្រព្យ និងសាងសង់អគារផ្សេងៗ ហើយបច្ចុប្បន្ននេះ កំពុងដំណើរការសាងសង់អគារប៊ែលធី ទី១២ និងសាកលវិទ្យាល័យ ប៊ែលធី អន្តរជាតិ បន្តទៀត។ ២-ប៊ែលធី ទេសចរណ៍(BELTEI Tour) មានបម្រើ សេវា០៤ធំៗដូចជា៖ (ក)-ទេសចរណ៍ ក្នុងស្រុកសម្រាប់ប្រជាជនកម្ពុជា (Domestic Tour Programs for Cambodians) (ខ)-ទេសចរណ៍ក្នុងស្រុក សម្រាប់ជនបរទេស ដែលកំពុងស្នាក់នៅ ធ្វើការក្នុងប្រទេស (Domestic Tour Programs for Expatriate) (គ)-កម្មវិធីនាំភ្ញៀវ ពីប្រទេសនានា មកទស្សនាប្រទេសកម្ពុជា(Inbound Tour Programs) (ឃ)-កម្មវិធីនាំភ្ញៀវ ពីប្រទេសកម្ពុជា ទៅទស្សនាក្រៅប្រទេស(Outbound Tour Programs) ៣-ប៊ែលធី អប់រំ (BELTEI Education) ដែលបានចែកចេញជា ៣ផែ្នកធំៗគឺៈ វិទ្យាស្ថាន ប៊ែលធី អន្តរជាតិ សាកលវិទ្យាល័យ ប៊ែលធី អន្តរជាតិ និងប៊ែលធី ទំនាក់ទំនងអន្តរជាតិ។ ក-វិទ្យាស្ថាន ប៊ែលធី អន្តរជាតិ អគារត្រូវបានសាងសង់ឡើង មានកំពស់៧ជាន់ និងមានជាន់ក្រោមដី មួយជាន់ (Basement) សម្រាប់ធ្វើជាចំណត និងមានបង្រៀន៥កម្មវិធីសិក្សាធំៗដូចជាៈ (១)-ចំណេះទូទៅ(ថ្នាក់ទី១-១២): សិក្សាតាមកម្មវិធីក្រសួងអប់រំ យុវជន និងកីឡា ដោយបន្ថែម ភាសាអង់គ្លេស និងកុំព្យូទ័រ។ (២)-ភាសាអង់គ្លេសទូទៅៈ ពីកម្រិតPreschool ដល់ Level12 សិក្សាតាមបែបអាមេរិកាំង(American System) ចំពោះសិស្ស Level 12(High-Advanced Level) ពេលបញ្ចប់ការសិក្សា ត្រូវទទួលបានវិញ្ញាបនបត្រ ២ប្រភេទគឺ៖ -ប្រភេទទី ១ ជាវិញ្ញាបនបត្រក្នុងស្រុក ដែលចេញ ដោយប៊ែលធី(Head Office)។ -ប្រភេទទី ២ ជាវិញ្ញាបនបត្រ(TOEFL) ដែលចេញដោយ ស្ថាប័ន ETS (Educational Testing Service) មានទីតាំងធំ នៅសហរដ្ឋអាមេរិក។ (៣)-មហាវិទ្យាល័យភាសាបរទេសៈ ដែលចាប់យកជំនាញតែមួយគត់ គឺបរិញ្ញាបត្រ (BA &BEd) និងបរិញ្ញាបត្រជាន់ខ្ពស់ (MEd) ផ្នែកអក្សរសាស្រ្ត អង់គ្លេស ដោយសិក្សាតាមប្រព័ន្ធក្រេឌីត។ (៤)-វគ្គបណ្តុះបណ្តាលកុំព្យូទ័រៈ មាន១២កម្មវិធី សិក្សាតាមកម្មវិធីថ្មី Microsoft Office 2010 ដែលស្របតាមតម្រូវការទីផ្សារបច្ចុប្បន្ន។ (៥)-ថ្នាក់ត្រៀមប្រឡងតេស្តអន្តរជាតិ (International Preparation Courses, TOEFL& ICDL)។ ខ-សាកលវិទ្យាល័យ ប៊ែលធី អន្តរជាតិ អគារត្រូវបានសាងសង់ ឡើងមានកំពស់ ១២ជាន់ និងមានជាន់ក្រោមដីមួយជាន់(Basement) សម្រាប់ធ្វើជាចំណត ដែលនឹងគ្រោងបើក ឲ្យដំណើរការនៅថ្ងៃទី០១ ខែតុលា ឆ្នាំ២០១២ ខាងមុខ និងមាន ៦មហាវិទ្យាល័យធំៗ ដូចជាៈ (១)-មហាវិទ្យាល័យ គ្រប់គ្រងពាណិជ្ជកម្ម (Faculty of Business Administration) (២)-មហាវិទ្យាល័យអប់រំ សិល្បៈ និងមនុស្សសាស្រ្ត (Faculty of Education, Arts, and Humanities) (៣)-មហាវិទ្យាល័យ នីតិសាស្រ្ត និងវិទ្យាសាស្រ្តសង្គម (Faculty of Law and Social Science) (៤)-មហាវិទ្យាល័យទេសចរណ៍ និងបដិសណ្ឋារកិច្ច (Faculty of Tourism and Hospitality) (៥)-មហាវិទ្យាល័យវិស្វកម្ម និងស្ថាបត្យកម្ម (Faculty of Engineering and Architecture) (៦)-មហាវិទ្យាល័យព័ត៌មានវិទ្យា និងវិទ្យាសាស្រ្ត (Faculty of Information Technology and Science) គ-ការិយាល័យទំនាក់ទំនង អន្តរជាតិៈ ត្រូវបានបង្កើតឡើងក្នុងគោលបំណងដូចខាងក្រោម៖ (១)-ការបញ្ជូនសិស្ស ទៅសិក្សាក្រៅប្រទេស (២)-កម្មវិធីផ្លាស់ប្តូរនិស្សិត (៣)-ការធ្វើកម្មសិក្សានៅក្រៅប្រទេស (៤)- ការអភិវឌ្ឍស្ថាប័ន។
ឆ្លៀតក្នុងឱកាសនោះដែរ ឯកឧត្តម អគ្គនាយក បានមានប្រសាសន៍ថាៈ សមិទ្ធិផល និងការរីកដុះដាលរបស់វិទ្យាស្ថាន ពីមួយឆ្នាំទៅមួយឆ្នាំ គឺដោយសារ ប្រទេសជាតិស្ថេរភាព ផ្នែកនយោបាយ និងមានសុខសន្តិភាពពេញលេញ ក្រោមគោលនយោបាយ ដឹកនាំដ៏ត្រឹមត្រូវ របស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាប្រមុខដឹកនាំដ៏ ឈ្លាសវៃប្រកបដោយ បញ្ញាញាណ និងគតិបណ្ឌិតដ៏ភ្លឺស្វាងនោះ បានដាក់ចេញនូវ យុទ្ធសាស្ត្រចតុកោណ បែរឆ្ពោះទៅរកការស្តារ ការកសាង និងការអភិវឌ្ឍឡើងវិញ គ្រប់ហេដ្ឋារចនាសម័ន្ធ រួមមាន សាលារៀនមានចាប់ពី បឋមសិក្សា រហូតដល់សាកលវិទ្យាល័យ មន្ទីរពេទ្យ វត្តអារាម ស្ពានថ្នល់ ផ្លូវជាតិធំៗ ដែលតភ្ជាប់ពី តំបន់មួយទៅតំបន់មួយ ទៀតពាសពេញប្រទេស និងសមិទ្ធិផលជាច្រើន ទៀតរាប់មិនអស់ ជាពិសេសរាជរដ្ឋាភិបាល ក៏បានចាត់ទុកវិស័យអប់រំ ជាវិស័យអាទិភាព ក្នុងចំណោមវិស័យ អាទិភាពសំខាន់ៗ ដែលមានចែងក្នុងកម្មវិធី នយោបាយរបស់រាជរដ្ឋាភិបាល ដើម្បីប្រែក្លាយ កម្ពុជាអោយទៅជា ប្រទេសមួយរីកចម្រើន ដែលប្រកបដោយធនធានមនុស្សយ៉ាងសម្បូរបែប។
ជាទីបញ្ចប់ ឯកឧត្តម អគ្គនាយក និងលោកជំទាវ បានប្រគល់វិញ្ញាបនបត្រអន្តរជាតិ(TOEFL) ចំនួន ១១នាក់ កម្រិតទី១២(Level12) ចំនួន ១៩៨នាក់ និងកម្រិតទី៦(Level6) ចំនួន ៦៥១នាក់ ជូនដល់សិស្សជ័យលាភីទាំងអស់ នាពេលនោះផងដែរ។
|