៣-ប្រវត្តិ​របស់​វិទ្យាស្ថាន​ ប៊ែល​ធី​ អន្តរជាតិ

វិទ្យាស្ថាន​ ប៊ែល​ធី​ អន្តរជាតិ​ មាន​ឈ្មោះ​ពេញ​ជា​ភាសា​ខ្មែរ​ វិទ្យាស្ថាន​ ប៊ែល​ធី អន្តរជាតិ និង​ជា​ភាសា​អង់គ្លេស​ថា​ BELTEI INTERNATIONAL INSTITUTE ហើយ​ឈ្មោះ​ BELTEI នេះ​ត្រូវ​បាន​ផ្តុំ​ឡើង​ដោយ​ ៦មុខ​វិជ្ជា​ធំៗ​ (6 subjects) ដូច​ជា​ BEL ​មក​ពី​ពាក្យ Business, Economics, Law, និង​ TEI មក​ពី​ពាក្យ​ Tourism, English, Information of Technology។​ វិទ្យាស្ថាន​ ប៊ែលធី​ អន្តរជាតិ​ គឺ​ជា​គ្រឹះ​ស្ថាន​សិក្សា​អប់រំ​ឯកជន​មួយ​ ដែល​ចាប់​បដិ​សន្ធិឡើង​ នៅ​ថ្ងៃ​ទី​០១​ ខែ​មករា​ ឆ្នាំ​២០០២​ លើ​ដីឡូត៍លេខ​៧៧ ផ្លូវ​១២៥​ សង្កាត់​វាលវង់​ ខណ្ឌ​៧មករា​ ក្រុង​ភ្នំពេញ។​ អគារ​សិក្សានេះ​ មាន​កំពស់​៥ជាន់​ សាង​សង់​ឡើង​ពី​បេតុង​អា​ម៉េ​ មាន​បន្ទប់​រៀន​ចំនួន​២៩​ បង្គន់​អនាម័យ​ចំនួន​៩​ ហើយ​នៅ​ជាន់​ទី​៥​ គឺ​ជា​ទែ​រ៉ាស់​សំរាប់​សិស្សានុសិស្ស​ហាត់​ប្រាណ​ ក៏​ដូច​ជា​លំ​ហែ​កាយ​ពេល​ចេញ​លេង​ ខាង​ក្រោម​គឺ​ ជា​ទី​ធ្លា​ សំរាប់​ដាក់​កង់​ ម៉ូតូ​(parking)​ និង​ក៏​ជា​ទី​តាំង​ដំបូង​បំផុត​ នៃ​កំណើត​វិទ្យាស្ថាន​ ប៊ែល​ធី​ អន្តរជាតិ​ ហើយ​យើង​ ក៏​បាន​ដាក់​ឈ្មោះ​ថា​ប៊ែល​ធី One។

-ឯកឧត្តម​ លី ឆេង គឺ​ជា​អតីត​នាយក​វិទ្យាស្ថាន​ ឆេង​ ហៀរ​ និង​បច្ចុប្បន្ន​ជា​ ទី​ប្រឹក្សា​អម​ទីស្តីការ​គណៈ​រដ្ឋមន្ត្រី​ ឋានៈស្មើ​អនុរដ្ឋលេខាធិការ​ ​ជា​អគ្គនាយក​ ប៊ែលធី​ គ្រុប​ និង ជា​​នាយក​វិទ្យាស្ថាន​ ប៊ែលធី​ អន្តរជាតិ​ ហើយ​ក៏​ជា​ស្ថាប​និក​តែ​មួយ​គត់​ ដែល​បាន​សាង​សង់​អគារ​នេះ​ឡើង​ ដោយ​ប្រើ​ប្រាស់​ធន​ធាន​ផ្ទាល់​ខ្លួន​ អស់​រាប់​សែន​ដុល្លា​ ក្នុង​គោល​បំណង​រួម​ចំណែក​បង្កើន​ធន​ធាន​មនុស្ស​ ជា​មួយ​រាជរដ្ឋា​ភិបាល​ ដែល​មាន​ សម្តេច​អគ្គ​មហា​សេនា​បតី​តេជោ​ ហ៊ុន​ សែន ជា​ប្រមុខ​ ដោយ​វិនិយោគ​ទៅ​លើ​វិស័យ​អប់រំ​ និង​ដើម្បី​រួម​ចំណែក​ បំបាត់​ភាព​ក្រីក្រ​នៅ​កម្ពុជា​ ដោយ​បាន​ប្រសិទ្ធនាម​ អគារ​នេះ​ថា​ វិទ្យាស្ថាន​ ឆេង​ ហៀរ។​ វិទ្យាស្ថាន​ ឆេង​ ហៀរ បាន​កំណត់​យក​មុខ​វិជ្ជា​ ភាសា​ចិន​ ជា​គោល​ដៅ​ចំបង​ ព្រម​ទាំង​ចំណេះ​ទូទៅ​ខ្មែរ​, ភាសា​អង់គ្លេស​ និង​ កុំព្យូទ័រ​ ស្រប​តាម​ប្រកាស​របស់​ក្រសួង​អប់រំ​ យុវជន​ និង​កី​ឡា​ លេខ​២៩១​ អយក.ប្រក​ ចុះ​ថ្ងៃ​ទី​២៥​ ខែ​មីនា​ ឆ្នាំ​២០០៣​ ដែល​ចុះ​ហត្ថលេខា​ដោយ​ ឯកឧត្តម​រដ្ឋលេខា​ធិការ​ អ៊ឹម​ សិទ្ធី។​ នៅក្នុង​ដំណើរ​អនុវត្តន៍​ របស់​វិទ្យាស្ថាន​ ឆេង​ ហៀរ ការ​បង្រៀន​ ភាសា​ចិន​ មិន​អាច​ដំណើរ​ការ​ទៅ​បាន​ មូល​ហេតុ​ដោយ​ទី​ផ្សារ​ភាសា​ចិន​មាន​ការ​ធ្លាក់​ចុះ​យ៉ាង​ខ្លាំង​ ពេល​នោះ​ គណៈគ្រប់​គ្រង​វិទ្យាស្ថាន​របស់​យើង​ ក៏បាន​សំរេច​ចិត្ត​ជា​ ឯកច្ឆន្ទ​ប្តូរ​ឈ្មោះ​ពី​វិទ្យាស្ថាន​ ឆេង​ ហៀរ ទៅ​ជា​ វិទ្យាស្ថាន​ប៊ែលធី​ អន្តរជាតិ វិញ​ ដើម្បី​ឲ្យ​ស្រប​ទៅ​នឹង​មុខ​វិជ្ជា​ ដែល​បាន​កំណត់​យក​សំរាប់​អនាគត។

-តាម​លិខិត​អនុញ្ញាត​របស់​សាលា​ក្រុង​លេខ​៣៦២៥​ លអ.ស​ ចុះ​ថ្ងៃ​ទី​២២ ខែ​ធ្នូ​ ឆ្នាំ​២០០៣​ អនុញ្ញាត​អោយ​វិទ្យាស្ថាន​ ប៊ែល​ធី​ បើក​បង្រៀន​ភាសា​បរទេស​ និង​កុំ​ព្យូទ័រ​ ដែល​ចុះ​ហត្ថលេខា​ដោយ​ ឯកឧត្តម​អភិបាល​រង​ រាជ​ធានី​ភ្នំពេញ​ ម៉ប់ សារិន។

-តាម​ប្រកាស​លេខ​១០៣២ អយក.ប្រក​ ចុះថ្ងៃ​ទី០៦​ ខែ​កក្កដា​ ឆ្នាំ​២០០៥​ អនុញ្ញាត​ឲ្យ​ប្តូរ​ឈ្មោះ​ ពី​សាលា​ ឆេង​ ហៀរ​ មក​ជា​ សាលា​ប៊ែល​ធី អន្តរជាតិ​ ដែល​ចុះ​ហត្ថ​លេខា​ដោយ​ ឯកឧត្តម​ទេស​រដ្ឋមន្ត្រី​ កុល​ ផេង។

-តាម​អនុក្រឹត្យ​​របស់​រាជរដ្ឋាភិបាល​ លេខ​ ៩៧​អនក្រ.បក​ ចុះថ្ងៃ​ទី​ ០៤​ ខែ​ សីហា​ ឆ្នាំ​ ២០០៥​ អនុញ្ញាត​ អោយ​វិទ្យាស្ថាន​ ប៊ែលធី​ បើក​ថ្នាក់​មហាវិទ្យាល័យ​ ដែល​ចុះ​ហត្ថ​លេខា​ដោយ​សម្តេច​អគ្គ​មហា​សេនា​បតី​តេជោ​ ហ៊ុន​ សែន នាយក​រដ្ឋមន្រ្តី​ នៃ​ព្រះរាជា​ណា​ចក្រ​កម្ពុជា។

-តាម​ប្រកាស​លេខ​ ១៤៥៦​ អយក.ប្រក​ ចុះ​ថ្ងៃទី​ ៣១​ ខែ​ សីហា​ ឆ្នាំ​ ២០០៦​ ស្ដីពី​ការ​ទទួល​ស្គាល់​ដេប៉ា​តឺម៉ង់​ថ្នាក់​សិក្សា​មូលដ្ឋាន​ ដែល​ចុះ​ហត្ថលេខា​ដោយ​ឯកឧត្តម​ទេស​រដ្ឋ មន្ត្រី​ បណ្ឌិត​ កុល​ ផេង ។

-វិញ្ញា​បនបត្រ​ទទួល​ស្គាល់​គុណភាព​អប់រំ ពេញសិទ្ធិ របស់​ ACC លេខ​ គ.ទ.ក​ ០២៤៦០៨៣២​ ចុះ​ថ្ងៃទី​ ២២​ ខែ​ តុលា​ ឆ្នាំ​ ២០០៨​ ដែល​ចុះ​ហត្ថ​លេខា​ដោយ​ឯកឧត្តម​ ឧប​នាយក​រដ្ឋមន្ត្រី​ សុខ​ អាន ។

មុខ​វិជ្ជា​ដែល​ត្រូវ​កំណត់​យកៈ
១. ចំណេះ​ទូទៅ​​ (General Education) មាន​ពី​ថ្នាក់​ទី១​ ដល់​ ទី១២​ សិក្សា​តាម​កម្ម​វិធីក្រសួង​​អប់រំ​ ហើយ​សិស្ស​ប៊ែល​ធី​ទាំងអស់​ មាន​សិទ្ធិ​ប្រលង​យក​សញ្ញា​បត្រ​ គ្រប់​ភូមិ​សិក្សា​ ដូច​សិស្ស​សាលា​រដ្ឋ​ដែរ ។
២. ភាសា​អង់​គ្លេស​ ជា​ភាសា​ទីពីរ​ ESL (English as a Second Language) ពី Level 1 ដល់ Level 12 សិក្សា​តាម​របៀប​អាមេ​រិកកាំង​ (American System)
៣. មហា​វិទ្យា​ល័យ​ សិល្បៈ​ មនុស្ស​សាស្រ្ត​ និង​ភាសា (Faculty of Arts, Humanities and Languages ) ថ្នាក់​ បរិញ្ញា​បត្រ​ (BA) និង​ បរិញ្ញា​បត្រ​រង​(AA)
៤. វគ្គ​បណ្តុះ​បណ្តាល​កុំ​ព្យូ​ទ័រ (Computer training Course) មាន​ ២២​មុខ​ជំនាញ​
៥. ថ្នាក់​ត្រៀម​ប្រឡង​ថូហ្វល(TOEFL Preparation Course) ការ​ប្រឡង​វាស់​ស្ទង់​សមត្ថ​ភាពផ្នែក​ភាសា​អង់គ្លេស​ ជា​លក្ខណៈ​ភាសា​អន្តរ​ជាតិ

អាស្រយ័​ដោយ​បាន​កំណត់​នូវ​មុខ​វិជ្ជា​ ដែល​ត្រូវ​ប្រកាន់​យក​សំរាប់​អនា​គត​ គណៈ​គ្រប់​គ្រង​របស់​យើង​ បាន​រៀបចំ​ប៊ែល​ធី​ស្តង់​ដា​តាម​គំរូ​ឯក​ភាព​គ្នាមួយ​(BELTEI Standard) សំរាប់​វិទ្យា​ស្ថាន​ ប៊ែល​ធី​ ទាំងអស់​ នៅ​គ្រប់​ទីតាំង​ អនុ​វត្ត​តាម​គោល​ការណ៍​តែ​មួយ​ ថ្ងៃ​តែ​មួយ​ ទៅ​លើ​ការ​ប្រឡង​ប្រចាំ​ខែ​ (Monthly Test) ប្រចាំ​ត្រីមាស​ (Quarterly Exam) ប្រចាំ​ឆមាស​ (Semester Exam) ឯក​ភាព​ក្នុង​ការ​អនុ​វត្ត​គោលនយោ​បាយ​ថ្នាក់​លើ​ បទ​បញ្ជា​ផ្ទៃ​ក្នុង​ សេច​ក្តី​ណែ​នាំ​ លិខិត​ បទ​ដ្ឋាន​ ផ្សេងៗ​ ថ្ងៃ​បើក​បវេ​សន​កាល​សំរាប់​ចំណេះ​ទូទៅ​ខ្មែរ​ ថ្ងៃ​បើក​វគ្គ​ថ្មី​ សំរាប់​ភាសា​អង់គ្លេស​ ឯក​ភាព​ទៅ​លើ​តំលៃ​សិក្សា​នៅ​គ្រប់​ទីតាំង​ ឯក​ភាព​ទៅ​លើ​ឯក​សារ​ផ្សេងៗ​តាម​កំរិត​ថ្នាក់​តាម​កំរិត​Level ហើយ​ការ​អនុវត្ត​របស់​យើង​គឺ​ព្រមៗ​គ្នា​តាម​គោល​នយោ​បាយ​ដឹក​នាំ​របស់​គណៈ​គ្រប់​គ្រង​ប៊ែល​ធី​ ដែល​បាន​ដាក់​ចុះ ។​ ដោយ​មាន​ការ​រីក​ចំរើន​ជា​បន្ត​បន្ទាប់​ ព្រម​ទាំង​មាន​ជំនឿ​ និង​មាន​ទំនុក​ចិត្ត​ពី​សំណាក់​ មាតា​បិតា​ អាណា​ព្យាបាល​សិស្ស​ សិស្សា​នុសិស្ស​ វិទ្យា​ស្ថាន​ ប៊ែល​ធី​ អន្តរ​ជាតិ​បាន​ពង្រីក​សាខា​របស់​ខ្លួន​បាន​ ១០​ទីតាំង​ នៅ​ក្នុង​ទី​ក្រុង​ភ្នំពេញ​ រួម​មានៈ

ប៊ែល​ធី​សាខា​ទី១​(គីរី​រម្យ)
ស្ថិត​នៅ​អគារ​លេខ​ ៧៧ ផ្លូវ​ ១២៥ សង្កាត់​វាល​វង់​​ខណ្ឌ​ ៧​មករា​ ក្រុង​ភ្នំពេញ​ ដែល​បាន​សម្ពោធ​បើក​អោយ​ដំណើរ​ការ​នៅ​ថ្ងៃទី​ ០១​ ខែ មករា​ ឆ្នាំ​ ២០០២​ ក្រោម​អធិប​តីភាព​ លោក​ អ៊ុំ ហឿង ប្រធាន​មន្ទីរ​អប់រំ​ យុវ​ជន​និង​កីឡា​រាជ​ធានី​ភ្នំពេញ​។ វិទ្យា​ស្ថាន​ ប៊ែល​ធី​ទី១​ សង់​ឡើង​ពី​បេតុង​អាម៉េ​ (Reinforced Concrete) កំពស់​ ៥​ជាន់​ មាន​ ៤១​បន្ទប់​ ដែល​ជា​កម្ម​សិទ្ធិ​ផ្ទាល់ខ្លួន​ និង​សាង​សង់​ដោយក្រុមហ៊ុន ​ប៊ែលធីសំណង់​ នៃ​ ប៊ែលធី គ្រុប។

ប៊ែល​ធី​សា​ខា​ទី​២​(ស្តុប​ទួលទំពូង​)
ស្ថិត​នៅ​អគារ​លេខ​១៣៩​ ផ្លូវ​១៦៣​ សង្កាត់​ទួល​ទំពូង​២​ ខណ្ឌ​ចំការ​មន​ ក្រុង​ភ្នំពេញ​ ហើយ​គឺ​ជា​ទី​តាំង​ថ្មី​ ដែល​បាន​ប្តូរ​មក​ពី​ទី​តាំង​​ចាស់ (ប៊ែលធី​ ម៉ៅ​សេទុង​) ដែល​ស្ថិត​នៅ​អគារ​លេខ​ ១៨៩​ មហា​វិថី​ម៉ៅ​​សេទុង​ សង្កាត់​ទួល​ស្វាយ​ព្រៃ១​ ខណ្ឌ​ចំការ​មន​ ក្រុង​ភ្នំពេញ​​ ដែល​បាន​ ចាប់​ដំណើរ​ការ​នៅ​ថ្ងៃ​ទី១៥​ ខែ​ឧសភា ឆ្នាំ២០០៤​ ប៉ុន្តែ​ត្រូវ​បាន​បិទ​ទៅ​វិញ​​នៅ​ថ្ងៃ​ទី៣០​ ខែសីហា​ ឆ្នាំ២០០៧​ ពី​ព្រោះ​កិច្ច​​សន្យា​​ត្រូវ​បាន​បញ្ចប់​​។​ វិទ្យាស្ថាន​ ប៊ែល​ធី អន្តរ​ជាតិ​ទី​២​ ​(ស្តុប​ទួលទំពូង​) នេះ​សង់​ឡើង​ពី​បេ​តុង​អាម៉េ​ (Reinforced Concrete) ​កំពស់​៦ជាន់​ មាន​៤៥​បន្ទប់​ ដែល​សាង​សង់​ដោយ​ក្រុមហ៊ុន​​ប៊ែលធី​សំណង់​នៃ​ប៊ែលធីគ្រុប​ និង​ជា​កម្ម​សិទ្ធិ​ផ្ទាល់​ខ្លួន គ្រោង​​​​នឹង​បើក​ឲ្យ​ដំណើរការ​ឡើង​វិញ​​នៅ​ថ្ងៃ​ទី​០២​ ខែ​សីហា​ ឆ្នាំ​២០១០​ ខាង​មុខ​នេះ។

ប៊ែល​ធី​សាខា​ទី​៣​(DN)
ស្ថិត​នៅ​អគារ​លេខ​ ៧A ផ្លូវ​២១៥​ សង្កាត់​ផ្សារ​ដេ​ប៉ូ​ទី៣​ ខណ្ឌ​ទួល​គោក​ ក្រុង​ភ្នំ​ពេញ​ដែល​បាន​សម្ពោធ​បើក​អោយ​ដំណើរ​ការ​នៅ​ថ្ងៃ​ទី​ ២០​ ខែ​ មេ​សា​ ឆ្នាំ​ ២០​០៥​ ក្រោម​ អធិប​តីភាព​ ឯក​ឧត្តម​ ម៉ប់​ សា​រិន អភិ​បាល​រង​រាជ​ធានី​ភ្នំពេញ​។​វិទ្យា​ស្ថាន​ប៊ែល​ធី​អន្តរ​ជាតិ​ ទី​៣​ សង់​ឡើង​ពី​បេ​តុង​អាម៉េ​(Reinforced Concrete) កំពស់​ ៥ជាន់​ មាន​៣២ បន្ទប់​ គឺជា​អគារ​ជួល​គេ។

ប៊ែល​ធី​សាខា​ទី៤​(ផ្សារ​ដើម​ថ្កូវ)
ស្ថិត​នៅ​អគារ​លេខ​ ៥៤​ ផ្លូវ​លេខ​ ៤៨៨​ សង្កាត់​ ផ្សារ​ដើម​ថ្កូវ​ ខណ្ឌ​ ចំការ​មន​ ក្រុង​ភ្នំពេញ​ ដែល​បាន​សម្ពោធ​បើក​អោយ​ដំណើរ​ការ​នៅ​ថ្ងៃ​ទី​ ០៣​ ខែ​ សីហា​ ឆ្នាំ​ ២០០៦​ ក្រោម​អធិប​តី​ភាព​ដ៏​ខ្ពង់​ខ្ពស់​របស់​ឯក​ឧត្តម​ កែប​ ជុតិមា អភិ​បាល​រាជ​ធានី​ភ្នំពេញ ។ វិទ្យា​ស្ថាន​ប៊ែល​ធី​ទី៤​ សង់​ឡើង​ពី​បេ​តុង​អាម៉េ​(Reinforced Concrete) កំពស់​ ៦ជាន់​ មាន​ ៤៥​បន្ទប់​ដែល​ជា​កម្ម​សិទ្ធិ​ផ្ទាល់​ខ្លួន​ និង​សាង​សង់​ដោយក្រុមហ៊ុន ​ប៊ែលធីសំណង់​ នៃ​ ប៊ែលធី គ្រុប។

ប៊ែល​ធី​សាខា​ទី៥​(ច្បារ​អំពៅ)
ស្ថិត​នៅ​អគារ​លេខ​ ៣៦ ផ្លូវ​ជាតិ​លេខ១​ សង្កាត់​ ច្បារ​អំពៅ​ ខណ្ឌ​ មាន​ជ័យ​ ក្រុង​ភ្នំពេញ ដែល​បាន​សម្ពោធ​បើក​អោយ​ដំណើរ​ការ​នៅ​ថ្ងៃទី​ ០២​ ខែ​ សីហា​ ឆ្នាំ​ ២០០៧​ ក្រោម​អធិប​តី​ភាព​ ឯក​ឧត្តម​ ម៉ប់​ សារិន អភិ​បាល​រង​រាជ​ធានី​ ភ្នំពេញ​។ វិទ្យា​ស្ថាន​ប៊ែល​ធី​ទី៥​ សង់​ឡើងពី​បេ​តុង​អាម៉េ​(Reinforced Concrete) កំពស់​៦ជាន់​មាន​៥៥ បន្ទប់​ ដែល​ជា​កម្ម​សិទ្ធិ​ផ្ទាល់​ខ្លួន​ និង​សាង​សង់​ដោយក្រុមហ៊ុន ​ប៊ែលធីសំណង់​ នៃ​ ប៊ែលធី គ្រុប។

ប៊ែលធី​សាខា​ទី៦​(អូរ​ឫស្សី​)
ការិ​យា​ល័យ​កណ្តាល​(Head Office) ស្ថិត​នៅ​អគារ​លេខ​ ២៥​A ផ្លូវលេខ​ ១០៥​ សង្កាត់​បឹង​ព្រលិត​ ខណ្ឌ​៧​មករា​ ក្រុង​ភ្នំពេញ​ ដែល​បាន​សម្ពោធ​បើក​អោយ​ដំណើរ​ការ​នៅ​ថ្ងៃទី​០៣​ ខែ​ មិថុនា​ ឆ្នាំ​ ២០០៨​ ក្រោម​អធិ​បតី​ភាព​ ដ៏​ខ្ពង់​ខ្ពស់​របស់​ឯក​ឧត្តម​ កែប ជុតិ​មា ទីប្រឹ​ក្សា​ផ្ទាល់​សម្តច​ អគ្គ​មហា​សេនា​ បតី​តេជោ​ ហ៊ុន​សែន នាយក​រដ្ឋ​មន្រ្តី​ នៃ​ព្រះ​រា​ជា​ណា​ចក្រ​កម្ពុជា​ និង​ ជា​អភិ​បាល​រាជ​ធានី​ភ្នំពេញ ។​វិទ្យា​ស្ថាន​ ប៊ែល​ធី​ទី៦​ សង់​ ឡើង​ពី​បេតុង​អាម៉េ​(Reinforced Concrete) កំពស់​៧ជាន់​ មាន​ ៦៣​បន្ទប់​ ដែល​ជា​កម្ម​សិទ្ធិ​ផ្ទាល់​ខ្លួន​​
និង​សាង​សង់​ដោយក្រុមហ៊ុន ​ប៊ែលធីសំណង់
នៃ​ ប៊ែលធី គ្រុប។

ប៊ែល​ធី​សាខា​ទី៧​ (ពេទ្យ​លោក​សង្ឃ)
ស្ថិត​នៅ​អគារ​លេខ​ ៩៦ ផ្លូវលេខ​១៦០​ កែង​ ២៦៥​ សង្កាត់​ ទឹក​ល្អក់២​ ខណ្ឌ​ទួល​គោក​ ក្រុង​ភ្នំពេញ​ ដែល​បាន​សម្ពោធ​បើក​អោយ​ដំណើរ​ការ​នៅ​ថ្ងៃទី​ ១៣​ ខែ​ តុលា​ ឆ្នាំ​២០០៨​ ក្រោម​អធិប​តីភាព​ដ៏​ខ្ពង់​ខ្ពស់​របស់​ឯក​ឧត្តម​ លី​ ឆេង ទី​ប្រឹក្សា​អម​ទីស្តី​ការ​គណៈ​រដ្ឋ​មន្រ្តី​ អគ្គ​នាយក​ប៊ែល​ធី​គ្រុប​ និង​ជា​នាយក​វិទ្យា​ស្ថាន​ប៊ែល​ធី​អន្តរ​ជាតិ​។​ វិទ្យា​ស្ថាន​ប៊ែល​ធី​ទី៧​ សង់​ឡើង​ពី​បេតុង​អាម៉េ​(Reinforced Concrete) កំពស់​៧ជាន់​ មាន​ ៦៥​បន្ទប់​ដែល​ជា​កម្ម​សិទ្ធិ​ផ្ទាល់​ខ្លួន​ និង​សាង​សង់​ដោយក្រុមហ៊ុន ​ប៊ែលធីសំណង់​ នៃ​ ប៊ែលធី គ្រុប។

ប៊ែល​ធី​សាខា​ទី៨​(ផ្សារ​ពោធិ៍​ចិន​តុង​)
ស្ថិត​នៅ​អា​គារ​លេខ​ ១២៣​ មហា​វិថី​ សហ​ព័ន្ធ​រុស្ស៊ី​ សង្កាត់​ កា​កាប​ ខណ្ឌ​ ដង្កោ​ ក្រុង​ភ្នំពេញ​ ដែល​បាន​សម្ពោធ​ បើក​អោយ​ដំណើរ​ការ​នៅ​ថ្ងៃទី​ ១៨​ ខែ​ ឧស​ភា​ ឆ្នាំ​ ២០០៩​ ក្រោម​អធិប​តីភាព​ដ៏​ខ្ពង់​ខ្ពស់​របស់​ឯក​ឧត្តម​ លី​ ឆេង ទី​ប្រឹក្សា​អម​ទី​ស្តី​ការ​គណៈ​រដ្ឋ​មន្រ្តី​ អគ្គ​នាយក​ ប៊ែល​ធី​ គ្រុប​ និង​ជា​នាយក​វិទ្យា​ស្ថាន​ ប៊ែល​ធី​ អន្តរ​ជាតិ​។​ វិទ្យា​ស្ថាន​ ប៊ែល​ធី​ទី៨​ សង់​ឡើង​ពី​បេតុង​អាម៉េ​ (Reinforced Concrete) កំពស់​ ៤ជាន់​ មាន​ ៥០​បន្ទប់​ ដែល​ជា​កម្ម​សិទ្ធិ​ផ្ទាល់​ខ្លួន​ និង​សាង​សង់​ដោយក្រុមហ៊ុន ​ប៊ែលធីសំណង់​ នៃ​ ប៊ែលធី គ្រុប។

ប៊ែល​ធី​សាខា​ទី៩​(ស្ទឹង​មាន​ជ័យ)
ស្ថិត​នៅ​អគារ​លេខ​ ៣០​៣២​ ផ្លូវ​ វេង​ស្រេង​ កែង​ ២១៧​ សង្កាត់​ ស្ទឹង​មាន​ជ័យ​ ខណ្ឌ​ មាន​ជ័យ​ ក្រុង​ភ្នំពេញ​ ដែល​​គ្រោងនឹង​បើកឲ្យ​ដំណើរ​ការ​នៅ​ថ្ងៃទី​ ០១​ ខែ​ កុម្ភៈ​ ឆ្នាំ​ ២០១០​។​ វិទ្យា​ស្ថាន​ប៊ែល​ធី​ ទី៩​ សង់​ឡើង​ពី​បេតុង​អាម៉េ​(Reinforced Concrete) កំពស់​ ៧ជាន់​ មាន​ជាង​ ១០០​បន្ទប់​ ដែល​ជា​កម្ម​សិទ្ធិ​ផ្ទាល់​ខ្លួន​និង​សាង​សង់ដោយ​ក្រុមហ៊ុន ​ប៊ែលធីសំណង់​ នៃ​ ប៊ែលធី គ្រុប។

ប៊ែល​ធី​សាខា​ទី​១០​ (ខាងលិចអាងទឹកអូឡាំពិក)
ស្ថិត​នៅ​អគារ​លេខ​ ៥៧ ផ្លូវ​២១៧​ កែង ផ្លូវ​​២៩០​ សង្កាត់​ទួលស្វាយព្រៃ២ ខណ្ឌ​ចំការមន​ ក្រុង​ ភ្នំ​ពេញ​ដែល​​គ្រោងនឹង​បើកឲ្យ​ដំណើរ​ការ​នៅ​ថ្ងៃទី​ ០១​ ខែ​ សីហា​ ឆ្នាំ​ ២០១០​។​ វិទ្យា​ស្ថាន​ប៊ែល​ធី​ ទី១០​ សង់​ឡើង​ពី​បេតុង​អាម៉េ​(Reinforced Concrete) កំពស់​ ៦ជាន់​ មាន​៨០​បន្ទប់​ ដែល​ជា​កម្ម​សិទ្ធិ​ផ្ទាល់​ខ្លួន​និង​សាង​សង់​ដោយ​ក្រុមហ៊ុន ​ប៊ែលធីសំណង់​ នៃ​ ប៊ែលធី គ្រុប។