១-សារស្វាគមន៍ពីនាយកវិទ្យាស្ថាន

ជាបឋមខ្ញុំសូមគោរព និងសូមស្វាគមន៍ចំពោះ សម្តេច ឯកឧត្តម លោកឧកញ៉ា លោកជំទាវ អស់លោក លោកស្រី អ្នកនាងកញ្ញា សិស្ស-និស្សិតទាំងអស់ ដែលបានឆ្លៀតឱកាស និងចំណាយពេលដ៏មានតម្លៃ របស់លោកអ្នក ចូលទស្សនាគេហទំព័រ របស់វិទ្យាស្ថាន ប៊ែលធី អន្តរជាតិ ដែលមានអាសយដ្ឋាន www.beltei.edu.kh ដើម្បីសិក្សាស្វែងយល់ពីប្រវត្តិ អត្ថន័យ ខ្លឹមសារ ព័ត៌មានថ្មីៗ ការគ្រប់គ្រង ការរីកចំរើន ក៏ដូចជាទិសដៅ និងផែនការជាយុទ្ធសាស្ត្ររបស់វិទ្យាស្ថាន ប៊ែលធី អន្តរជាតិ ទៅអនាគត។ ដោយឈរលើ ឆន្ទៈស្រឡាញ់វិស័យអប់រំ និងមានបំណងចូលរួមចំណែក បង្កើនធនធានមនុស្ស ជាមួយរាជរដ្ឋាភិបាល ព្រមទាំង អភិវឌ្ឍប្រទេសយើង អោយរីកចំរើនឆាប់រហ័ស និងស្របតាមយុទ្ធសាស្ត្រចតុកោណ (ដើម្បីកំណើន ការងារ សមធម៌ និងប្រសិទ្ធភាព នៅកម្ពុជា ) របស់រាជរដ្ឋាភិបាលដែលមាន សម្តេចអគ្គមហាសេនបតីតេជោ ហ៊ុន សែន ជាវីរៈកុលបុត្រខ្មែរដ៏ឆ្នើម និងជាប្រមុខរាជរដ្ឋាភិបាលដ៏ឈ្លាសវៃ ខ្ញុំក៏បានបង្កើតវិទ្យាស្ថានឯកជនមួយដែលបានដាក់ឈ្មោះថា វិទ្យាស្ថាន ប៊ែលធី អន្តរជាតិ BELTEI INTERNATIONAL INSTITUTE ព្រមទាំងបានសម្ភោធដាក់អោយដំណើរការតាំងពីថ្ងៃទី១ ខែមករា ឆ្នាំ២០០២រហូតមកដល់បច្ចុប្បន្ននេះ។
វិទ្យាស្ថានក៏បានដាក់ចេញនូវបាវចនា បួន ជាអាទិភាពរបស់ខ្លួនសម្រាប់អនាគតគឺ “គុណភាព ប្រសិទ្ធភាព ឧត្តមភាព និង សីលធម៌” ។
ដើម្បី រួមចំណែកសម្រេចឲ្យបានជោគជ័យនូវយុទ្ធសាស្រ្តចតុកោណ និងបាវចនាខាងលើ វិទ្យាស្ថានក៏បាន រៀបចំរចនាសម្ព័ន្ធគ្រប់គ្រងនៅគ្រប់ជាន់ថ្នាក់ ដើម្បីអោយស្របទៅតាមតម្រូវការរបស់អង្គភាព ហើយនៅការិយាល័យកណ្តាល (Head Office) យើងបានរៀបចំបែងចែកជា ៦ការិយាល័យក្នុងនោះមានការិយាល័យរដ្ឋបាល ការិយាល័យគណនេយ្យ ការិយាល័យធនធានមនុស្ស ការិយាល័យពត៌មានវិទ្យា ការិយាល័យទំនាក់ទំនងអន្តរជាតិ និងការិយាល័យសិក្សា និងស្រាវជ្រាវ ហើយការិយាល័យនីមួយៗសុទ្ធតែមានការងារ និងភារកិច្ចរៀងៗខ្លួនដែលត្រូវបំពេញក្នុងគោលបំណងបំរើអោយសេវា អប់រំនៅគ្រប់សាខា របស់ប៊ែលធី អន្តរជាតិទាំងអស់ ។
វិទ្យាស្ថាន ក៏បានខិតខំបើកវគ្គបណ្តុះបណ្តាល ដើម្បីបំប៉នជំនាញជូនដល់បុគ្គលិកតាមផ្នែកនីមួយៗអោយកាន់ប្រសើរ ឡើងនូវគុណភាពការងារ និងបានបើកវគ្គបំប៉នចិត្ត-គរុកោសល្យ ជូនដល់លោកគ្រូ-អ្នកគ្រូទាំងអស់ធ្វើយ៉ាងណាអោយបុគ្គលិកគ្រប់ផ្នែក មានសមត្ថភាពគ្រប់គ្រាន់ក្នុងការបំពេញភារកិច្ច ព្រមទាំងធ្វើយ៉ាងណាអោយសិស្សចំណេះទូទៅដែលបានបញ្ចប់ថ្នាក់ ទី១២ និងសិស្សរៀនភាសាអង់គ្លេសដែលបានបញ្ចប់ Level12 អាចយកចំណេះរបស់ខ្លួនទៅប្រើប្រាស់ទាំងភាសាខ្មែរ និងភាសាអង់គ្លេសប្រកបដោយគុណភាព អាចចូលប្រកួតក្នុងទីផ្សារការងារថ្នាក់ជាតិ និងទីផ្សារការងារអន្តរជាតិបានដោយជោគជ័យ ។ វិទ្យាស្ថានក៏បានជម្រុញការអប់រំសីលធម៌សង្គម ណែនាំសិស្ស-និស្សិតឲ្យស្គាល់អត្តសញ្ញាណរបស់ខ្លួនច្បាស់លាស់ អោយចេះស្រឡាញ់ជាតិមាតុភូមិរបស់ខ្លួន អោយចេះគោរពច្បាប់រដ្ឋ គោរពបទបញ្ជាផ្ទៃក្នុងរបស់វិទ្យាស្ថាន និងចេះសាមគ្គីគ្នាបានល្អរវាងសិស្ស និងសិស្ស សិស្ស និងគ្រូ ថ្នាក់ដឹកនាំ និងបុគ្គលិក មិនប្រកាន់ឋានៈ វណ្ណភាព ជាពិសេសទំនាក់ទំនងល្អរវាង សាលា គ្រួសារ និងសង្គម ព្រមទាំងអោយស្របតាមគោលការណ៍សិក្សាមាន ៣ប្រភេទគឺ រៀនពីសាលា រៀនពីការងារ រៀនដោយខ្លួនឯង ។
វិទ្យាស្ថានក៏បានកំណត់យកមុខវិជ្ជាធំៗ៥រួមមានៈ
	១-ចំណេះទូទៅ (General Education) មានពីថ្នាក់ទី១ ដល់ទី១២ សិក្សាតាមកម្មវិធីក្រសួងអប់រំយុវជន និងកីឡា និងមានបន្ថែមភាសាអង់គ្លេសលើចំនងជើង-ចំនងជើងរង និងសិក្សាកម្មវិធីកុំព្យូទ័រ ចាប់ពីថ្នាក់ទី៦ដល់ទី៨។ ពេលបញ្ចប់ការសិក្សាតាមកំរិត បឋម-ទុតិយភូមិ សិស្សទាំងអស់ ត្រូវទទួលបានសញ្ញាបត្រដែលទទួលស្គាល់ដោយក្រសួងអប់រំ យុវជន និងកីឡា។
	២-ភាសាអង់គ្លេសទូទៅ (ESL, English as Second Language) ពី កំរិតPre-School ដល់ Level12 សិក្សាតាមបែបអាមេរិកកាំង (American System) ហើយសៀវភៅសិក្សាទាំងអស់ត្រូវបានជួយឧបត្ថម្ភដោយក្រុមហ៊ុន McGraw-Hill Education នៅសហរដ្ឋអាមេរិក។ ចំពោះសិស្ស Level 12 (High-Advanced Level) ពេលបញ្ចប់ការសិក្សាត្រូវទទួលបានវិញ្ញាបនបត្រ ២ប្រភេទ ដែលមានដូចខាងក្រោមៈ ប្រភេទទី១ ជាវិញ្ញាបនបត្របញ្ជាក់ការសិក្សាកំរិតក្នុងស្រុក ដែលចេញដោយ ប៊ែលធីការិយាល័យកណ្តាល (Head Office)។ ប្រភេទទី២ ជាវិញ្ញាបនបត្រភាសាអង់គ្លេសកំរិតអន្តរជាតិ (Password ឬ TOEFL) ដែលចេញ ដោយក្រុមហ៊ុន English Language Testing Ltd មានទីតាំងនៅទីក្រុងឡុងនៃប្រទេសអង់គ្លេស និងវិញ្ញាបនបត្រថូហ្វល (TOEFL) ដែលចេញដោយស្ថាប័ន ETS (Educational Testing Service) មានទីតាំងធំនៅសហរដ្ឋអាមេរិក។
	៣-មហាវិទ្យាល័យភាសាបរទេស ដែលចាប់យកជំនាញតែមួយគត់គឺ បរិញ្ញាបត្រ បរិញ្ញាបត្ររង ផ្នែកអក្សរសាស្ត្រអង់គ្លេស (BA, BEd & AA In English)។ សិក្សាតាមប្រព័ន្ធក្រេឌីត។
	៤-វគ្គបណ្តុះបណ្តាលកុំព្យូទ័រ (Computer Training Course) ដែលមាន ២២កម្មវិធី ហើយកម្មវិធីទាំងនោះ គឺស្របតាមតម្រូវការទីផ្សារបច្ចុប្បន្ន។
	៥-ថ្នាក់ត្រៀមប្រឡងតេស្តអន្តរជាតិៈ វិទ្យាស្ថាន ប៊ែលធី អន្តរជាតិ បានទទួលសិទ្ធិ និងច្បាប់អនុញ្ញាតអោយបើកមជ្ឈមណ្ឌលប្រឡងតេស្តជាអន្តរជាតិជាផ្លូវការធំៗ ៣ ពីបណ្តាស្ថាប័នភាសាអង់គ្លេស និងកុំព្យូទ័រជាអន្តរជាតិ ដូចជាៈ
	ក-មជ្ឈមណ្ឌលប្រឡងតេស្តថូហ្វល (TOEFL iBT, Test of English as a Foreign Language) ជាមជ្ឈមណ្ឌលប្រឡងតេស្តវាស់ស្ទង់សមត្ថភាពភាសាអង់គ្លេសជាអន្តរ ជាតិ ដែលទទួលស្គាល់ជាង ១៦០ប្រទេសនៅលើពិភពលោក និងចេញច្បាប់អនុញ្ញាត ដោយស្ថាប័ន (Educational Testing Services) ដែលមានទីតាំងនៅសហរដ្ឋអាមេរិក ។
	ខ-មជ្ឈមណ្ឌលប្រឡងតេស្តភាសាអង់គ្លេសអន្តរជាតិ (Password Test) ជាមជ្ឈមណ្ឌលប្រឡង តេស្តវាស់ស្ទង់សមត្ថភាពភាសាអង់គ្លេសបែប English System ដែលទទួលស្គាល់ដោយក្រុមហ៊ុន English Language Testing Ltd ដែលមានទីតាំងនៅទីក្រុងឡុង នៃប្រទេសអង់គ្លេស ។
	គ-មជ្ឈមណ្ឌលប្រឡងតេស្តកុំព្យូទ័រអន្តរជាតិ ICDL (International Computer Driving License) ជាមជ្ឈមណ្ឌលប្រឡងតេស្តវាស់ស្ទង់សមត្ថភាពផ្នែកកុំព្យូទ័រជាអន្តរ ជាតិ សំរាប់និស្សិត ដែលត្រូវទៅរៀននៅក្រៅប្រទេស និងបំពេញការងារតាម អង្គការ ក្រុមហ៊ុននានាផងដែរ ដែលទទួលស្គាល់ដោយ ICDL Foundation ដែលមានទីតាំងនៅប្រទេសអង់គ្លេស ។
គ្រប់តេស្តអន្តរជាតិទាំងអស់សុទ្ធតែបានរៀបចំឡើងតាមបែបខ្នាត អន្តរជាតិ ហើយសិស្សដែលបានប្រឡងតេស្តអន្តរជាតិនៅមជ្ឈមណ្ឌលប្រឡងរបស់ប៊ែលធី (ការិយាល័យកណ្តាល អូរឫស្សី) នឹងទទួលបានវិញ្ញាបនបត្រអន្តរជាតិ ដែលចេញដោយស្ថាប័នខាងលើដោយផ្ទាល់ ។
កម្មវិធីសិក្សាគ្រប់មុខវិជ្ជាទាំងអស់ យើងបានកំណត់កាលវិភាគសិក្សាច្បាស់លាស់ បែងចែកមេរៀនតាមខែត្រីមាស ឆមាស ហើយរយៈពេលសិក្សា ត្រូវបានឯកភាពគ្នា តាំងពីថ្ងៃចាប់ផ្តើម ថ្ងៃប្រឡង និងថ្ងៃបញ្ចប់ ដូចនេះនៅគ្រប់ទីតាំងរបស់ ប៊ែលធីទាំងអស់ ត្រូវអនុវត្តគោលការណ៍ស្តង់ដាតែមួយ (BELTEI Standard)។
ចំពោះ លោកគ្រូ-អ្នកគ្រូ សាស្រ្តាចារ្យ ទាំងខ្មែរ និងបរទេស សុទ្ធតែមានសញ្ញាបត្រថ្នាក់បណ្ឌិត អនុបណ្ឌិត បរិញ្ញាបត្រ ព្រមទាំងមានទេពកោសល្យ បទពិសោធន៍គ្រប់គ្រាន់ក្នុងការបង្រៀន ធ្វើឲ្យសិស្សរបស់យើងងាយយល់ ឆាប់ចាប់បាន ឆាប់ចេះ និងទទួលបាននូវចំណេះដឹង ប្រកបដោយសមត្ថភាពយ៉ាងពិតប្រាកដ។
វិទ្យាស្ថាន ក៏បានយកចិត្តទុកដាក់ បំពាក់នូវសម្ភារៈទំនើបៗ ទាន់សម័យដូចជាៈ VCD, OHP, LCD Projector, Listening Lab, and Internet, រូបភាព, ពាក្យស្លោក, រូបមន្តតាមកំរិត ថ្នាក់នីមួយៗ ហើយគ្រប់បន្ទប់មានម៉ាស៊ីនត្រជាក់ បំពាក់ដោយកាមេរ៉ាសំរាប់តាមដាន ការសិក្សារបស់សិស្ស និងការបង្រៀនរបស់គ្រូ។ យើងក៏មានមោទនភាពផងដែរ ដោយអគារសិក្សា ដែលបំពាក់ដោយម៉ាស៊ីនភ្លើងធំៗកំលាំង ១៥០KVA នៅគ្រប់សាខាប៊ែលធីទាំងអស់ ព្រមទាំងបានបំពាក់សម្ភារៈយ៉ាងសម្បូរបែប ជាកម្មសិទ្ធផ្ទាល់របស់ ប៊ែលធី ។
នៅទីបញ្ចប់ខ្ញុំសូមថ្លែង អំណរគុណយ៉ាងជ្រាលជ្រៅចំពោះការចូលទស្សនាគេហទំព័ររបស់វិទ្យាស្ថាន ប៊ែលធី អន្តរជាតិ ហើយខ្ញុំសង្ឃឹម និងជឿជាក់ថា សម្តេច ឯកឧត្តម លោកឧកញ៉ា លោកជំទាវ អស់លោក លោកស្រី អ្នកនាងកញ្ញា សិស្ស-និស្សិត នឹងផ្តល់កិត្តិយសអញ្ជើញមកទស្សនាផ្ទាល់នូវតាមបណ្តាសាខា ព្រមទាំង ស្វែងយល់ពីព័ត៌មានលំអិតបន្ថែមទៀត ស្តីពីការបំរើសេវាលើវិស័យអប់រំនៅក្នុងវិទ្យាស្ថាន ប៊ែលធី អន្តរជាតិរបស់យើង។
យើងខ្ញុំនឹងរង់ចាំស្វាគមន៍ សម្តេច ឯកឧត្តម លោកឧកញ៉ា លោកជំទាវ លោក លោកស្រី អ្នកនាងកញ្ញា សិស្ស-និស្សិត ដោយក្តីសោមនស្សរីករាយជានិច្ច។
សូមគោរពជូនពរ សុខភាពល្អ និងជោគជ័យគ្រប់ភារកិច្ច។

វគ្គសិក្សាថ្មី ឆ្នាំ២០១០-២០១១

អបអរសាទរការបើក

វិទ្យាស្ថានប៊ែលធីអន្តរជាតិទី១០

ចូលរៀន:០៦-០៩-២០១០

-បង់១ឆ្នាំផ្តល់ជូន

ឯកសណ្ឋាន ២សម្រាប់

-បង់១វគ្គផ្តល់ជូន

សៀវភៅគូល័រ ១ឈុត

ផុតកំណត់:២០-០៩-២០១០

ដៃគូអប់រំ

កិច្ចសហការក្រៅប្រទេស

មជ្ឈមណ្ឌលប្រឡងតេស្តអន្តរជាតិ

១-មជ្ឈមណ្ឌលប្រឡងតេស្ត
ភាសាអង់គ្លេស ថូហ្វល

២-មជ្ឈមណ្ឌលប្រឡងតេស្ត
ភាសាអង់គ្លេស Password

៣-មជ្ឈមណ្ឌលប្រឡងតេស្ត
កុំព្យូទ័រ ICDL

ទំនាក់ទំនង

ការិយាល័យ កណ្តាល

អាសយដ្ឋានៈ #២៥A, ផ្លូវ១០៥,សង្កាត់បឹងប្រលិត,៧មករា,
ក្រុងភ្នំពេញ, កម្ពុជា
អ៊ីម៉េលៈ info@beltei.edu.kh
ទូរស័ព្ទ: ០១២ ៨២៣ ៦៦៦
០២៣ ៩៩៩៩ ៨៦
០២៣ ៩៩៩៩ ៧៥
ទូរសារ: ០២៣ ៩៩៦ ៨៨៩

អ្នកបើកមើលវិបសាយ

យើងមាន ភ្ញៀវ 6 នាក់
កំពុងបើកមើល

ចំនួនអ្នកមើល 66683

I-ចំណេះទូទៅ

ផ្តល់នូវចំណេះដឹងទូទៅ និងសីលធម៌ អានបន្ថែម

II-ភាសាអង់គ្លេសទូទៅ

ឱកាសសិក្សានៅក្រៅប្រទេសអានបន្ថែម

III-ថ្នាក់មហាវិទ្យាល័យ

ឯកទេសភាសាអង់គ្លេស អានបន្ថែម

IV-ថ្នាក់កុំព្យូទ័រ

មានកម្មវិធីថ្មីៗពេញនិយម អានបន្ថែម

V-ថ្នាក់ថូហ្វល

តេស្តភាសាអង់គ្លេសជាអន្តរជាតិអានបន្ថែម