ពិធីចុះហត្ថលេខាលើអនុស្សរណៈយោគយល់(MOU) រវាងវិទ្យាស្ថាន ប៊ែលធី អន្តរជាតិ

ជាមួយនឹងសាកលវិទ្យាល័យ York Saint John នៃចក្រភពអង់គ្លេស

នៅសាលសន្និសីទ នៃវិទ្យាស្ថាន ប៊ែលធី អន្តរជាតិទី៩ (សាខាស្ទឹងមានជ័យ) ថ្ងៃទី២១ ខែកុម្ភៈ ឆ្នាំ២០១១ បានរៀបចំពិធីចុះហត្ថលេខាលើអនុស្សរណៈយោគយល់(MOU) រវាងវិទ្យាស្ថាន ប៊ែលធី អន្តរជាតិ ជាមួយនឹងសាកលវិទ្យាល័យ York Saint John នៃចក្រភពអង់គ្លេស ក្រោមអធិបតីភាពដ៏ខ្ពង់ខ្ពស់របស់ ឯកឧត្តម លី ឆេង អគ្គនាយក ប៊ែលធី គ្រុប និងជានាយកវិទ្យាស្ថាន ប៊ែលធី អន្តរជាតិ និង Professor David Maughan Brown សាកលវិទ្យាធិការរង នៃសាកលវិទ្យាល័យ York Saint John ព្រមទាំងមានការអញ្ជើញចូលរួមពីថ្នាក់ដឹកនាំ លោកគ្រូ-អ្នកគ្រូ និងសិស្ស-និស្សិត នៃវិទ្យាស្ថាន ប៊ែលធី អន្តរជាតិ ទាំងអស់។

ឯកឧត្តម លី ឆេង អគ្គនាយក ប៊ែលធី គ្រុប និងជានាយកវិទ្យាស្ថាន ប៊ែលធី អន្តរជាតិ បានធ្វើរបាយការណ៍ថាៈ វិទ្យាស្ថាន ប៊ែលធី អន្តរជាតិ បានបង្កើតឡើងនៅថ្ងៃទី ០១ ខែមករា ឆ្នាំ២០០២ បច្ចុប្បន្នមានទីតាំងចំនួន ១១សាខា នៅក្នុងរាជធានីភ្នំពេញ និងមានសិស្ស-និស្សិតកំពុងសិក្សាចំនួន ១៧.១០៣នាក់ ក្នុងនោះនារីចំនួន ៩.២១៧នាក់។ វិទ្យាស្ថានបាន បង្កើតជា ប៊ែលធី គ្រុប តាមវិញ្ញាបនបត្រក្រសួងពាណិជ្ជកម្ម លេខ១៨១២ ពណ.នតក ចុះថ្ងៃទី ១៧ ខែឧសភា ឆ្នាំ២០០៧ ដែលមានបម្រើសេវាធំៗ ៣ដូចជាៈ
១-ប៊ែលធី សំណង់
២-ប៊ែលធី ទេសចរណ៍
៣-ប៊ែលធី អប់រំ

ដោយឡែក ប៊ែលធី អប់រំ បានចែកចេញជា ២ផែ្នកគឺៈ វិទ្យាស្ថាន ប៊ែលធី អន្តរជាតិ និងសាកលវិទ្យាល័យ ប៊ែលធី អន្តរជាតិ។
ក-វិទ្យាស្ថាន ប៊ែលធី អន្តរជាតិ អគារមានកំពស់៧ជាន់ និងមានបងៀ្រន៥កម្មវិធីសិក្សាធំៗដូចជាៈ
១-ចំណេះទូទៅ(ថ្នាក់ទី១-១២)
២-ភាសាអង់គ្លេសទូទៅ(គ្រប់កម្រិត)
៣-មហាវិទ្យាល័យភាសាបរទេស
៤-វគ្គបណ្តុះបណ្តាលកុំព្យូទ័រ
៥-ថ្នាក់ត្រៀមប្រឡងតេស្តអន្តរជាតិ (TOEFL, Password & ICDL)។

ខ-សាកលវិទ្យាល័យ ប៊ែលធី អន្តរជាតិ អគារមានកំពស់ ១២ជាន់ ដែលមាន ៦មហាវិទ្យាល័យធំៗ ដូចជាៈ
១-មហាវិទ្យាល័យគ្រប់គ្រងពាណិជ្ជកម្ម
២-មហាវិទ្យាល័យវិទ្យាសាស្រ្តអប់រំ និងភាសា
៣-មហាវិទ្យាល័យនិតិសាស្រ្ត និងវិទ្យាសាស្រ្តសេដ្ឋកិច្ច
៤-មហាវិទ្យាល័យទេសចរណ៍ និងបដិសណ្ឋារកិច្ច
៥-មហាវិទ្យាល័យវិស្វកម្ម និងស្ថាបត្យកម្ម
៦-មហាវិទ្យាល័យព័ត៌‌មានវិទ្យា។
ប៊ែលធី គ្រុប ក៏បានបង្កើតការិយាល័យទំនាក់ទំនងអន្តរជាតិ(International Relations Office) ដែលមានទីតាំង ស្ថិតនៅ ប៊ែលធីទី១០ (សាខាអាងទឹកអូឡាំពិក) និងមានបម្រើសេវាដូចជា៖
១-ការបញ្ជូនសិស្សទៅសិក្សាក្រៅប្រទេស
២-កម្មវិធីផ្លាស់ប្តូរនិស្សិត
៣-ការធ្វើកម្មសិក្សានៅក្រៅប្រទេស
៤-ការអភិវឌ្ឍស្ថាប័ន។
ការិយាល័យនេះក៏មានភារកិច្ចធ្វើការទំនាក់ទំនង និងធ្វើកិច្ចសហប្រតិបត្តិការជាមួយសាកលវិទ្យាល័យល្បីៗនៅឯក្រៅប្រទេសដូចជាៈ ចក្រភពអង់គ្លេស សហរដ្ឋអាមេរិក ម៉ាឡេស៊ី និងប្រទេសនានាមួយចំនួនទៀតនៅលើពិភពលោក ដើម្បីចុះអនុស្សរណៈយោគយល់(MOU) រវាងប៊ែលធី និងសាកលវិទ្យាល័យក្រៅប្រទេសទាំងនោះ ដោយអនុវត្តតាមគោលការណ៍ស្តង់ដារអន្តរជាតិ ដូចជាការបញ្ជូននិស្សិតទៅសិក្សានៅក្រៅប្រទេសរយៈពេល ១ឆមាស, ១ឆ្នាំ, ឬតាមកម្មវិធីៈ១+៣, ២+២, ឬ៣+១ មានន័យថាៈ សិស្សបញ្ចប់ថ្នាក់ឆ្នាំសិក្សាមូលដ្ឋាននៅប៊ែលធី អាចបន្តការសិក្សានៅឯសាកលវិទ្យាល័យក្រៅប្រទេសក្នុងឆ្នាំទី២, ឆ្នាំទី៣ ឬឆ្នាំចុងក្រោយ ដើម្បីប្រឡងយកសញ្ញាបត្របរិញ្ញាបត្រពីសាកលវិទ្យាល័យទាំងនោះដោយស្វ័យប្រវត្តិ។ ជាក់ស្តែងការចុះហត្ថលេខាលើអនុស្សរណៈ(MOU)ថ្ងៃនេះគឺមាន ៧ចំណុចសំខាន់ៗដូចខាងក្រោមៈ ១-ការផ្លាស់ប្តូរនិស្សិត ២- ការផ្លាស់ប្តូរបុគ្គលិកសិក្សា ៣-ការផ្លាស់ប្តូរព័ត៌មានសិក្សា ៤-កម្មវិធីសិក្សានៅបរទេស ៥-កម្មវិធីថ្នាក់ឆ្នាំសិក្សាមូលដ្ឋានអន្តរជាតិ ៦-និស្សិតដែលបានបញ្ចប់ការសិក្សាឆ្នាំទី៣ នៅប៊ែលធី អាចទៅបន្តការសិក្សា ឆ្នាំទី៤(៣+១) នៅសាកលវិទ្យាល័យ York Saint John ហើយនិស្សិតដែលបានបញ្ចប់ថ្នាក់បរិញ្ញាបត្រនៅប៊ែលធី ក៏អាចបន្តការសិក្សាថ្នាក់បរិញ្ញាបត្រជាន់ខ្ពស់Master នៅសាកលវិទ្យាល័យ York Saint John បានផងដែរ។ ៧- ផ្តល់ជូន វគ្គសិក្សាខ្លីៗរយៈពេល១ឆមាស ឫ១ឆ្នាំ នៅសាកលវិទ្យាល័យ York Saint John នៃចក្រភពអង់គ្លេស សម្រាប់បង្កើនភាសាអង់គ្លេស និងយល់ដឹងអំពីវប្បធម៌របស់ចក្រភពអង់គ្លេស។

ក្នុងឱកាសនោះដែរ Professor David Maughan Brown សាកលវិទ្យាធិការរង នៃសាកលវិទ្យាល័យ York Saint John បានធ្វើការចាប់អារម្មណ៍ថាៈ លោកមានក្តីសប្បាយរីករាយណាស់ ដោយវិទ្យាស្ថាន ប៊ែលធី អន្តរជាតិ បានរៀបចំពិធីចុះហត្ថលេខាលើអនុស្សរណៈ(MOU) ជាមួយនឹងសាកលវិទ្យាល័យ York Saint John នៃចក្រភពអង់គ្លេស។ ដោយមើលឃើញថា វិទ្យាស្ថាន ប៊ែលធី អន្តរជាតិ មានកម្មវិធីសិក្សាដែលមានលក្ខណៈជាអន្តរជាតិ និងជាគ្រឹះស្ថានអប់រំឯកជនមួយដែលឈានមុខគេ និងល្បីឈ្មោះជាងគេនៅកម្ពុជា ព្រោះសិស្ស-និស្សិតដែលបានបញ្ចប់ការសិក្សាពីប៊ែលធីសុទ្ធតែមានសមត្ថភាពគ្រប់គ្រាន់ទាំងផ្នែកចំណេះដឹងទូទៅ និងភាសា ហើយអាចបន្តការសិក្សានៅសាកលវិទ្យាល័យនានា នៅចក្រភពអង់គ្លេសបាន ជាពិសេសនៅ សាកលវិទ្យាល័យ York Saint John របស់លោក។

ជាទីបញ្ចប់ ឯកឧត្តម លី ឆេង និង Professor David Maughan Brown បានចុះហត្ថលេខាលើអនុស្សរណៈយោគយល់គ្នា ព្រមទាំងបានប្រគល់ វត្ថុអនុស្សាវរីយ៍ជូនគ្នាទៅវិញទៅមក នាពេលនោះផងដែរ។

ព្រឹត្តិការណ៍ពិសេស

26/01/2011:ឯកឧត្តមឯកអគ្គរាជទូត Andrew Mace និងឯកឧត្តម ស៊ាន បូរ៉ាត ប្រគល់វិញ្ញាបនបត្រដល់សិស្សប៊ែលធី	06/12/2010:វិទ្យាស្ថានប៊ែលធី អន្តរជាតិ សហការរៀបចំពិធី “ពិព័រណ៍អប់រំថ្នាក់ឧត្តមសិក្សានៃប្រទេសម៉ាឡេស
05/02/2010:ឯកអគ្គរាជទូតចក្រភពអង់គ្លេសប្រចាំនៅកម្ពុជាចែកវិញ្ញាបនបត្រអន្តរជាតិដល់សិស្សប៊ែលធី	09/12/2009:ដំណើរទស្សនកិច្ចរបស់គណៈប្រតិភូអប់រំនៃប្រទេសម៉ាឡេស៊ី ..........
14/11/2009:ពិធីចុះហត្ថលេខានៃការបើកដំណើរការមជ្ឈមណ្ឌលប្រឡង ICDL និង Password	05/11/2009:លទ្ធផលនៃដំណើរទស្សនៈកិច្ចសិក្សារបស់វិទ្យាស្ថាន ប៊ែលធី អន្តរជាតិ នៅប្រទេសអង់គ្លេស