ឯកឧត្តម ឯកអគ្គរាជទូត Andrew Mace ប្រគល់វិញ្ញាបនបត្រអន្តរជាតិ
និងឯកឧត្តម ស៊ាន បូរ៉ាត ប្រគល់វិញ្ញាបនបត្រក្នុងស្រុក ជំនាន់ទី១៦ &ទី១៧
ជូនដល់សិស្សភាសាអង់គ្លេសទូទៅកម្រិតទី៦ និងទី១២
នៅសាលសន្និសីទ នៃវិទ្យាស្ថាន ប៊ែលធី អន្តរជាតិទី៩ (សាខាស្ទឹងមានជ័យ) ថ្ងៃទី២៤ ខែមករា ឆ្នាំ២០១១ បានរៀបចំពិធីប្រគល់វិញ្ញាបនបត្រជូនដល់សិស្សភាសាអង់គ្លេសទូទៅកម្រិតទី៦ និងទី១២ ជំនាន់ទី១៦ &ទី១៧ និងភាសាអង់គ្លេសអន្តរជាតិ(Password) មានចំនួនសរុប ៧២២នាក់ នារី ៣៤៦នាក់ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម Andrew Mace ឯកអគ្គរាជទូត នៃចក្រភពអង់គ្លេស ប្រចាំនៅកម្ពុជា និងឯកឧត្តម ស៊ាន បូរ៉ាត ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងជារដ្ឋលេខាធិការ ក្រសួងអប់រំ យុវជន និងកីឡា ព្រមទាំងថ្នាក់ដឹកនាំប៊ែលធីទាំងអស់។ ឯកឧត្តម លី ឆេង អគ្គនាយក ប៊ែលធី គ្រុប និងជានាយកវិទ្យាស្ថាន ប៊ែលធី អន្តរជាតិ បានធ្វើរបាយការណ៍ថាៈ វិទ្យាស្ថាន ប៊ែលធី អន្តរជាតិ គឺជាគ្រឹះស្ថានសិក្សាឯកជនមួយ ដែលចាប់បដិសន្ធិឡើងនៅថ្ងៃទី ០១ ខែមករា ឆ្នាំ២០០២ និងបានពង្រីកសាខារបស់ខ្លួនបានចំនួន ១០កន្លែង ដែលជាកម្មសិទ្ធិរបស់ប៊ែលធី និងមានគណៈគ្រប់គ្រង បុគ្គលិក និងសាស្រ្តាចារ្យ បម្រើការ សរុបចំនួន ៨៧១នាក់ នារី ៣០៩នាក់ ព្រមទាំងសិស្ស-និស្សិត កំពុងសិក្សាចំនួន ១៧.១០៣នាក់ ក្នុងនោះនារីចំនួន ៩.២១៧នាក់។ ដោយមានការរីកចម្រើនជាបន្តបន្ទាប់ និងបានអនុវត្តយ៉ាងខ្ជាប់ខ្ជួនតាមបាវចនារបស់ខ្លួនគឺ “គុណភាព ប្រសិទ្ធភាព ឧត្តមភាព សីលធម៌ គុណធម៌” (Quality, Efficiency, Excellence, Morality, Virtue) វិទ្យាស្ថាន ប៊ែលធី អន្តរជាតិ ក៏បានបង្កើតជា ប៊ែលធី គ្រុប តាមវិញ្ញាបនបត្រក្រសួងពាណិជ្ជកម្ម លេខ១៨១២ ពណ.នតក ចុះថ្ងៃទី ១៧ ខែឧសភា ឆ្នាំ២០០៧ ដែលមានបម្រើសេវាធំៗ ៣ដូចជាៈ ១-ប៊ែលធី សំណង់ (BELTEI Construction) ទិញ+លក់ អចលនទ្រព្យ និងសាងសង់អគារផ្សេងៗ ហើយច្ចុប្បន្ននេះ កំពុងដំណើរការសាងសង់អគារប៊ែលធី ទី១១ និងសាកលវិទ្យាល័យ ប៊ែលធី អន្តរជាតិ បន្តទៀត។ ២-ប៊ែលធី ទេសចរណ៍ (BELTEI Tour) នឹងគ្រោងបើកឲ្យដំណើរការនៅពេលឆាប់ៗខាងមុខនេះ។ ៣-ប៊ែលធី អប់រំ (BELTEI Education) ដែលបានចែកចេញជា ២ផែ្នកគឺៈ វិទ្យាស្ថាន ប៊ែលធី អន្តរជាតិ និងសាកលវិទ្យាល័យ ប៊ែលធី អន្តរជាតិ។ ក-វិទ្យាស្ថាន ប៊ែលធី អន្តរជាតិ អគារត្រូវបានសាងសង់ មានកំពស់៧ជាន់ និងមានជាន់ក្រោមដីមួយជាន់ (Basement)សម្រាប់ធ្វើជាចំណត និងមានបងៀ្រន៥កម្មវិធីសិក្សាធំៗដូចជាៈ ១-ចំណេះទូទៅ(ថ្នាក់ទី១-១២) (General Education, Grade 1-12) ២-ភាសាអង់គ្លេសទូទៅ(គ្រប់កម្រិត) (ESL, English as a Second Language, Level1-12) ៣-មហាវិទ្យាល័យភាសាបរទេស (Faculty of Foreign Languages) ៤-វគ្គបណ្តុះបណ្តាលកុំព្យូទ័រ (Computer Training Course) ៥-ថ្នាក់ត្រៀមប្រឡងតេស្តអន្តរជាតិ (International Preparation Courses, TOEFL, Password & ICDL)។ ខ-សាកលវិទ្យាល័យ ប៊ែលធី អន្តរជាតិ អគារត្រូវបានសាងសង់មានកំពស់ ១២ជាន់ និងមានជាន់ក្រោមដីមួយជាន់(Basement)សម្រាប់ធ្វើជាចំណត ដែលនឹងគ្រោងបើកឲ្យដំណើរការ នៅឆ្នាំ២០១២ខាងមុខដោយមានមហាវិទ្យាល័យធំៗ ដូចជាៈ ១-មហាវិទ្យាល័យគ្រប់គ្រងពាណិជ្ជកម្ម (Faculty of Business Administration) ២-មហាវិទ្យាល័យវិទ្យាសាស្រ្តអប់រំ និងភាសា (Faculty of Educational Science and Languages) ៣-មហាវិទ្យាល័យនិតិសាស្រ្ត និងវិទ្យាសាស្រ្តសេដ្ឋកិច្ច (Faculty of Law and Economic Science) ៤-មហាវិទ្យាល័យទេសចរណ៍ និងបដិសណ្ឋារកិច្ច (Faculty of Tourism and Hospitality) ៥-មហាវិទ្យាល័យវិស្វកម្ម និងស្ថាបត្យកម្ម (Faculty of Engineering and Architecture) ៦-មហាវិទ្យាល័យព័ត៌មានវិទ្យា (Faculty of Information Technology) ប៊ែលធី គ្រុប ក៏បានបង្កើតការិយាល័យទំនាក់ទំនងអន្តរជាតិ (International Affairs Office) ក្នុងគោលបំណងធ្វើការទំនាក់ទំនង និងជ្រើសរើសសាកលវិទ្យាល័យល្អៗនៅឯក្រៅប្រទេសដូចជា សហរដ្ឋអាមេរិក ចក្រភព-អង់គ្លេស ម៉ាឡេស៊ី និងប្រទេសនានាមួយចំនួនទៀតនៅលើពិភពលោក ដើម្បីចុះអនុស្សរណៈ(MOU) ឬកិច្ចសន្យាជាផ្លូវការ និងនាំយកព័ត៌មានរបស់សាកលវិទ្យាល័យ ល្អៗទាំងនោះ មកជម្រាបជូន ដល់មាតាបិតា អាណាព្យាបាល សិស្ស-និស្សិតទាំងអស់ ដែលមានបំណង ចង់បញ្ជូនបុត្រធីតា ទៅសិក្សានៅឯបរទេស និងធ្វើការសម្រេចចិត្ត អោយបានច្បាស់លាស់ មុននឹងបញ្ជូនបុត្រ-ធីតាទៅសិក្សានៅ សាកលវិទ្យាល័យ នៃប្រទេសណាមួយ ដែលពួកគាត់ពេញចិត្ត ។ ការិយាល័យទំនាក់ទំនងអន្តរជាតិនេះ មានទីតាំងស្ថិតនៅវិទ្យាស្ថាន ប៊ែលធី អន្តរជាតិទី១០(សាខាអាងទឹកអូឡាំពិក) និងមានបម្រើសេវាដូចជា៖ ១-ការបញ្ជូនសិស្សទៅសិក្សាក្រៅប្រទេស (Overseas Study Service) ២-កម្មវិធីផ្លាស់ប្តូរនិស្សិត(Student Exchange Program) ដែលមានរយៈពេលពី ៦ខែ ទៅ១ឆ្នាំឬ២ឆ្នាំ ៣-ការធ្វើកម្មសិក្សានៅក្រៅប្រទេស (Field Study) ដែលមានរយៈពេលពី ១ខែ ទៅ៣ខែ ៤-ការអភិវឌ្ឍស្ថាប័ន (Institutional Development)។ បន្ទាប់មក ឯកឧត្តម Andrew Mace ឯកអគ្គរាជទូត នៃចក្រភពអង់គ្លេស ប្រចាំនៅកម្ពុជា មានចំណាប់អារម្មណ៍ថាៈ វិទ្យាស្ថាន ប៊ែលធី អន្តរជាតិ គឺជាគ្រឹះស្ថានសិក្សាឯកជនមួយ ដែលមានការរីកដុះដាលខ្លាំង និងល្បីឈ្មោះជាងគេនៅក្នុងប្រទេសកម្ពុជា ព្រមទាំងមានគុណភាពអប់រំខ្ពស់ ស្របតាមស្តង់ដារអន្តរជាតិពិតប្រាកដ ព្រោះសិស្ស-និស្សិតសុទ្ធតែមានសមត្ថភាពគ្រប់គ្រាន់ផ្នែកភាសាអង់គ្លេស និងបានប្រឡងជាប់តេស្តអន្តរជាតិ Password របស់ចក្រភពអង់គ្លេសនៅក្នុងថ្ងៃនេះផងដែរ។ ឯកឧត្តម ក៍បានថ្លែងនូវការកោតសរសើរចំពោះវិទ្យាស្ថានប៊ែលធី អន្តរជាតិ ដែលមានទំនាក់ទំនងល្អជាមួយសកលវិទ្យាល័យនានា ក៍ដូចជាស្ថាប័នអប់រំនៅចក្រភពអង់គ្លេស និងទទួលបានច្បាប់អនុញ្ញាតអោយបើកមជ្ឍមណ្ឌលប្រឡងតេស្ត Password ដំបូងគេបង្អស់នៅក្នុងប្រទេសកម្ពុជា ព្រោះថាការធ្វើតេស្ត Password ក៍ជាផ្នែកមួយបង្កលក្ខណៈងាយស្រួលជូនដល់សិស្ស-និស្សិត ដើម្បីសុំទិដ្ឋាការទៅសិក្សាបន្តនៅចក្រភពអង់គ្លេសផងដែរ។ បន្ទាប់មក ឯកឧត្តម ស៊ាន បូរ៉ាត ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃ ព្រះរាជាណាចក្រកម្ពុជា និងជារដ្ឋលេខាធិការ ក្រសួងអប់រំ យុវជន និងកីឡា បានមានប្រសាសន៍ថាៈ ការអភិវឌ្ឍប្រទេសជាតិឲ្យមានភាពរីកចម្រើនរុងរឿងទៅបាន គឺទាមទារជាចាំបាច់បំផុត នូវការកំណត់គោលដៅជាអាទិភាពទៅលើការកសាងគ្រឹះដ៏រឹងមាំនៃកត្តាធនធានមនុស្ស។ ឆ្លងតាមរយៈនេះ រាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន ជាប្រមុខដឹកនាំដ៏ឈ្លាសវៃប្រកបដោយគតិបណ្ឌិតនោះ គឺបានដាក់ចេញនូវយុទ្ធសាស្រ្ត ចតុកោណ បែរឆ្ពោះទៅរកការស្តារ ការកសាង និងការអភិវឌ្ឍ ដោយក្នុងនោះ ការលើកកម្ពស់វិស័យអប់រំ គឺជាវិស័យអាទិភាពចម្បង ដើម្បីប្រែក្លាយកម្ពុជាឲ្យទៅជាប្រទេសមួយរីកចម្រើនជឿនលឿន ប្រកបដោយធនធានមនុស្សយ៉ាងសម្បូរបែបសម្រាប់បច្ចុប្បន្ន និងទៅអនាគត។ ឆ្លៀតនៅក្នុងឱកាសនោះដែរ ឯកឧត្តម ស៊ាន បូរ៉ាត ក៏បានថ្លែងនូវការកោតសសរសើរចំពោះ ឯកឧត្តមអគ្គនាយក ប៊ែលធី គ្រុប គណៈគ្រប់គ្រង បុគ្គលិក សាស្រ្តាចារ្យ លោកគ្រូ-អ្នកគ្រូ នៃវិទ្យាស្ថាន ប៊ែលធី អន្តរជាតិទាំងអស់ ដែលបានខិតខំយកចិត្តទុកដាក់បំពេញភារកិច្ចរបស់ខ្លួន និងមានការឯកភាពផ្ទៃក្នុងបានយ៉ាងល្អប្រសើរ រហូតធ្វើអោយ វិទ្យាស្ថានមានការរីកចម្រើនជាបន្តបន្ទាប់ឥតឈប់ឈរ ដោយធានាបាននូវនិរន្តភាពនៃការបណ្តុះបណ្តាល និងឈរលើគោលការណ៍គុណភាពជាចម្បង ស្របតាមទស្សនៈវិស័យ ប្រកបដោយគតិបណ្ឌិតដ៏ខ្ពង់ខ្ពស់បំផុតរបស់ សម្តេចអគ្គមហា-សេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។ ជាទីបញ្ចប់ឯកឧត្តម Andrew Mace បានប្រគល់វិញ្ញាបនបត្រអន្តរជាតិចំនួន ៤២នាក់ និងឯកឧត្តម ស៊ាន បូរ៉ាត ក៏បានប្រគល់វិញ្ញាបនបត្រកម្រិតទី៦ ចំនួន ៣៤៦នាក់ កម្រិតទី១២ ចំនួន ១៧៥នាក់ ជូនដល់សិស្សជ័យលាភីទាំងអស់ នាពេលនោះផងដែរ។ |